پُرامن دنیا کی جانب بڑھنے کے لیے سرحدوں کی حفاظت ضروری ہے: محسن نقوی

وفاقی وزیر داخلہ محسن نقوی نے واضع الفاظ میں اعلان کیا ہے کہ پاکستان عالمی سطح پر اپنا مثبت کردار ادا کرنے کے لیے مکمل طور پر پرعزم ہے، اور ایک پرامن دنیا کی جانب بڑھنے کے لیے سرحدوں کی مؤثر حفاظت ناگزیر ہے۔

کرغزستان کے دارالحکومت بشکیک میں منعقدہ شنگھائی تعاون تنظیم (SCO) کے اعلیٰ سطح کے اجلاس سے خطاب کرتے ہوئے وفاقی وزیر داخلہ محسن نقوی نے علاقائی سلامتی، باہمی تعاون اور سرحدی انتظام پر پاکستان کا واضع مؤقف پیش کیا۔وزیر داخلہ محسن نقوی نے اپنے خطاب میں سرحدوں کی حفاظت کو خطے کے امن سے جوڑتے ہوئے درج ذیل اہم نکات پر روشنی ڈالی

انہوں نے واضح کیا کہ بارڈر سکیورٹی کو یقینی بنانے اور جدید چیلنجز سے نمٹنے کے لیے شنگھائی تعاون تنظیم (SCO) کا پلیٹ فارم انتہائی اہمیت کا حامل ہے۔ سرحدوں کی پائیدار حفاظت اور سکیورٹی اقدامات کو مضبوط بنانے کے لیے خطے کے تمام ممالک کو مشترکہ اور اجتماعی کاوشیں کرنا ہوں گی۔

وزیر داخلہ کا کہنا تھا کہ بارڈر سکیورٹی نہ صرف ملکوں کے امن بلکہ سرحدی جرائم، اسمگلنگ اور غیر قانونی سرگرمیوں کی مؤثر روک تھام کے لیے بھی بے حد ضروری ہے۔وفاقی وزیر داخلہ نے بین الاقوامی اصولوں کا اعادہ کرتے ہوئے کہا کہ پاکستان دنیا کے ہر ملک کی خودمختاری اور سالمیت کا دل سے احترام کرتا ہے۔انہوں نے مزید کہا کہ موجودہ دور کے سکیورٹی چیلنجز کا تقاضا ہے کہ خطے کے ممالک ایک دوسرے کے تجربات اور مہارت سے فائدہ اٹھائیں، تاکہ مشترکہ حکمتِ عملی کے ذریعے پائیدار امن کے ہدف کو حاصل کیا جا سکے