ایران کی پہلی 10 نکاتی تجویز مسترد، نئی تجاویز پر بات جاری ہے: امریکی نائب صدر

امریکا کے نائب صدر جے ڈی وینس نے انکشاف کیا ہے کہ ایران کی پہلی دس نکاتی تجویز کو مسترد کر دیا گیا ہے اور اب نئی دس نکاتی تجویز پر ایران اور پاکستان کے ساتھ بات چیت جاری ہے۔

میڈیا سے گفتگو کرتے ہوئے جے ڈی وینس نے کہا کہ بعض بین الاقوامی ذرائع ابلاغ اور ایران کے کچھ حلقے غلط نکات پیش کر رہے ہیں، جن کا حقیقت سے کوئی تعلق نہیں۔

انہوں نے بتایا کہ آبنائے ہرمز میں بحری ٹریفک میں اضافہ دیکھا جا رہا ہے، جبکہ مجوزہ معاہدے کے تحت جنگ بندی، مذاکرات اور ہرمز کو کھلا رکھنا بنیادی نکات میں شامل ہیں۔

نائب صدر کا کہنا تھا کہ اب اگلا قدم ایران کو اٹھانا ہوگا، اور جتنا تعاون ایران کرے گا، امریکا بھی اسی تناسب سے ردعمل دے گا، جبکہ پابندیوں میں نرمی پر بھی بات چیت ممکن ہے، بشرطیکہ ایران یورینیم کی افزودگی سے باز رہے۔

جنگ بندی کی خلاف ورزی کے حوالے سے انہوں نے کہا کہ کسی بھی سیز فائر میں معمولی خامیاں ہونا معمول کی بات ہے۔

ایرانی پارلیمنٹ کے اسپیکر کے بیان پر ردعمل دیتے ہوئے انہوں نے کہا کہ اگر پندرہ نکاتی منصوبے میں صرف چند نکات پر اختلاف ہے تو یہ مثبت پیش رفت ہے کہ باقی امور پر اتفاق موجود ہے۔

انہوں نے مزید کہا کہ فریقین کے درمیان نیتوں کے حوالے سے عدم اعتماد موجود ہے، جبکہ لبنان کے معاملے پر بھی غلط فہمیاں سامنے آئی ہیں۔

جے ڈی وینس نے واضح کیا کہ امریکا نے کبھی لبنان کو جنگ بندی میں شامل کرنے کی بات نہیں کی، تاہم اگر ایران اس بنیاد پر مذاکرات ختم کرتا ہے تو یہ اس کا اپنا فیصلہ ہوگا۔