پاکستان سمیت 8 اسلامی ممالک کی فلسطینیوں کو جبری بے دخل کرنے کی مذمت

اسلام آباد: پاکستان، سعودی عرب، مصر، ترکیہ، قطر، اردن، انڈونیشیا اور متحدہ عرب امارات کے وزرائے خارجہ نے ایک مشترکہ اعلامیے میں اسرائیلی کابینہ کی جانب سے فلسطینیوں کو ان کی سرزمین سے جبری بے دخل کرنے کے بیانات اور منصوبوں کی شدید ترین الفاظ میں مذمت کی ہے۔

مشترکہ اعلامیے میں 8 اسلامی ممالک کے وزرائے خارجہ نے کہا ہے کہ اسرائیلی وزیرِ دفاع اور قومی سلامتی کے وزیر کی جانب سے غزہ سے فلسطینیوں کی ممکنہ بے دخلی سے متعلق دیے گئے بیانات بین الاقوامی قوانین اور انسانی حقوق کے اصولوں کی صریح خلاف ورزی ہیں۔ انہوں نے واضح کیا کہ فلسطینیوں کو ان کی آبائی زمین سے اکھاڑنے کی کسی بھی کوشش کو ہرگز قبول نہیں کیا جائے گا اور ایسے اقدامات کے پورے خطے کی سلامتی کے لیے انتہائی خطرناک نتائج برآمد ہوں گے۔

اعلامیے میں مزید کہا گیا کہ اسرائیلی اقدامات مشرقِ وسطیٰ میں امن کے لیے جاری بین الاقوامی کوششوں اور امریکی صدر ڈونلڈ ٹرمپ کے غزہ تنازع کے خاتمے کے جامع پلان کی صریح نفی ہیں۔ اسلامی ممالک نے زور دیا کہ غزہ کی پٹی، مغربی کنارہ اور مشرقی یروشلم مقبوضہ فلسطینی سرزمین کا ناقابلِ تنسیخ حصہ ہیں، اور خطے میں پائیدار امن کے قیام کا واحد حل اقوامِ متحدہ کی قراردادوں کے مطابق دو ریاستی نظریے پر عمل درآمد میں ہی مضمر ہے۔