ایران کا حوثیوں کو باب المندب بند کرنے کی تیاری کا پیغام، عالمی توانائی بحران کا خدشہ

ایران نے یمن کے حوثی گروپ کو اہم ترین اسٹریٹجک ہدایت جاری کرتے ہوئے الرٹ کر دیا ہے کہ اگر امریکہ نے ایرانی توانائی کے بنیادی ڈھانچے کو نشانہ بنایا، تو وہ بحیرہ احمر کے اہم ترین بحری راستے ‘باب المندب’ کو بند کرنے کے لیے تیار رہیں۔ برطانوی خبر رساں ادارے ‘رائٹرز’ کی رپورٹ کے مطابق، حوثیوں نے اس وارننگ کے بعد باب المندب کے قریب میزائل اور ڈرون تعینات کر دیے ہیں اور وہ حملے کے حتمی حکم کے منتظر ہیں۔ ذرائع کا کہنا ہے کہ باب المندب بند کرنے کے کسی بھی فیصلے کی براہِ راست نگرانی یمن میں موجود ایرانی پاسدارانِ انقلاب کے نمائندے کریں گے، اور یہ پیغام دو سینئر ایرانی حکام اور ایک علاقائی ذریعے کے مطابق حوثیوں کو پہنچایا جا چکا ہے۔

جون میں ایران اور امریکہ کے درمیان ہونے والی عارضی جنگ بندی کے خاتمے کے بعد خطے میں کشیدگی دوبارہ عروج پر پہنچ گئی ہے۔ آبنائے ہرمز کی بندش کے خدشے کے باعث سعودی عرب اپنے تیل کی بڑی مقدار بحیرہ احمر کے متبادل راستے سے منتقل کر رہا ہے، جس سے باب المندب کی اہمیت مزید بڑھ گئی ہے۔ اس وقت عالمی توانائی کی تقریباً 7 فیصد ترسیل اسی راستے سے ہوتی ہے۔ ماہرین کے مطابق، اگر حوثی اس بحری گزرگاہ پر جہازوں یا بندرگاہوں کو نشانہ بناتے ہیں تو عالمی سطح پر تیل کی قیمتوں، سپلائی چین اور بین الاقوامی تجارت کو شدید دھچکا لگے گا۔ ماضی میں بھی غزہ جنگ کے دوران حوثی حملوں کے باعث متعدد بین الاقوامی شپنگ کمپنیوں کو افریقہ کا طویل اور مہنگا متبادل راستہ اختیار کرنا پڑا تھا، جس سے سفری لاگت اور وقت میں بے پناہ اضافہ ہوا تھا۔ اب باب المندب میں ممکنہ کشیدگی سے عالمی توانائی کی ترسیل کو بدترین خطرات لاحق ہو گئے ہیں۔