لامرد پر بمباری میں فاسفورس کے استعمال کے شواہد ملے ہیں، ایرانی وزارت صحت

ایرانی وزارتِ صحت نے انکشاف کیا ہے کہ لامرد میں کی جانے والی حالیہ بمباری کی تحقیقات مکمل کر لی گئی ہیں، جن کے نتائج سے یہ بات سامنے آئی ہے کہ اس حملے میں ممنوعہ فاسفورس کا استعمال کیا گیا تھا۔ ایرانی حکام کے مطابق تحقیقاتی رپورٹ سے یہ ثابت ہوا ہے کہ فاسفورس کی زد میں آ کر ہونے والے انسانی زخم انتہائی شدید ہیں اور ان کے بھرنے میں لمبا وقت درکار ہوتا ہے۔ ایران نے اعلان کیا ہے کہ اس مجرمانہ بمباری کے تمام تحقیقاتی نتائج اور ثبوت بین الاقوامی فورمز پر پیش کیے جائیں گے۔

ایرانی حکام نے بتایا کہ اس حملے کے دوران دشمن نے دانستہ طور پر شہری آبادی کو نشانہ بنایا، جس میں رہائشی عمارتوں کے علاوہ ‘شہید نعیمی سپورٹس ہال’ کو بھی بمباری کا نشانہ بنایا گیا۔ اس افسوسناک واقعے میں بچوں اور خواتین سمیت 21 افراد جاں بحق ہو گئے تھے۔ ایرانی حکام کا کہنا ہے کہ شہری آبادی پر فاسفورس کا استعمال بین الاقوامی قوانین کی شدید ورزی ہے اور اس حوالے سے عالمی برادری کو اپنا کردار ادا کرنا ہو گا۔