ایران کی جنگ بندی معاہدے کی توثیق، آبنائے ہرمز کھولنے کا اعلان

خطے میں جاری کشیدگی کے خاتمے کی جانب ایک تاریخی پیش رفت کے طور پر ایران کی سپریم نیشنل سکیورٹی کونسل نے جنگ بندی معاہدے کی باقاعدہ توثیق کرتے ہوئے عالمی تجارت کے لیے انتہائی اہم ‘آبنائے ہرمز’ کو فوری کھولنے کا اعلان کر دیا ہے۔ ایرانی وزیر خارجہ عباس عراقچی نے اس اہم موڑ پر پاکستان کے وزیراعظم شہباز شریف اور فیلڈ مارشل سید عاصم منیر کی سفارتی کوششوں کو زبردست خراجِ تحسین پیش کرتے ہوئے کہا ہے کہ پاکستانی قیادت نے جنگ بندی کے لیے ان تھک محنت کی جس کے نتائج آج امن کی صورت میں سامنے آ رہے ہیں۔ واضح رہے کہ یہ پیش رفت امریکی صدر ڈونلڈ ٹرمپ کی جانب سے ایران پر حملے کی ڈیڈ لائن میں دو ہفتے کی توسیع کے بعد ممکن ہوئی ہے، جو انہوں نے پاکستانی قیادت کی خصوصی درخواست پر دی تھی۔

امریکی صدر ڈونلڈ ٹرمپ نے سوشل میڈیا پر اپنے پیغام میں تصدیق کی ہے کہ پاکستان کے وزیراعظم اور فیلڈ مارشل کے ساتھ ہونے والی بات چیت کے نتیجے میں فوجی کارروائی کو مؤخر کیا گیا ہے، تاہم اس کا انحصار ایران کی جانب سے آبنائے ہرمز کو محفوظ بنانے اور مذاکرات کی میز پر آنے پر تھا۔ صدر ٹرمپ نے دعویٰ کیا کہ امریکہ اپنے بیشتر فوجی اہداف حاصل کر چکا ہے اور اب ایران کے ساتھ طویل المدتی امن معاہدے کے قریب پہنچ چکا ہے۔ ایرانی وزیر خارجہ کا کہنا ہے کہ تہران امن کے لیے پیش کیے گئے 10 نکاتی منصوبے پر عملدرآمد کے لیے پرعزم ہے، جس کا مقصد خطے میں کشیدگی کو کم کرنا اور پائیدار استحکام کو یقینی بنانا ہے۔ عالمی مبصرین اس کامیابی کو پاکستانی سفارتکاری کی ایک بڑی جیت قرار دے رہے ہیں جس نے دنیا کو ایک ہولناک جنگ سے بچانے میں کلیدی کردار ادا کیا۔