ہسپتالوں اور طبی مراکز کو نشانہ بنانا جنگی جرم اور قابلِ مذمت عمل ہے: ایران

ایران کی وزارتِ خارجہ کے ترجمان اسماعیل بقائی نے امریکہ کی جانب سے طبی مراکز کو نشانہ بنائے جانے کی شدید مذمت کرتے ہوئے اسے کھلا جنگی جرم قرار دیا ہے۔ ترجمان نے دعویٰ کیا ہے کہ ایران کے شہر اہواز میں واقع بچوں کے کینسر ہسپتال کے قریب امریکی حملہ ہوا، جس کے باعث پیدا ہونے والی ہنگامی صورتحال کے پیشِ نظر ہسپتال کو فوری طور پر خالی کرانا پڑا۔

اسماعیل بقائی کے مطابق، اس حملے کے باعث پیدا ہونے والے سکیورٹی خدشات کی وجہ سے کیموتھراپی کے زیرِ علاج 211 معصوم بچوں کو فوری طور پر دیگر طبی مراکز میں منتقل کیا گیا۔ انہوں نے عالمی برادری پر تنقید کرتے ہوئے مزید کہا کہ جو ممالک اور ادارے دنیا بھر میں انسانی حقوق کے علمبردار ہونے کا دعویٰ کرتے ہیں، وہ ہسپتالوں اور صحت کے مراکز کو نشانہ بنائے جانے کے ایسے سنگین واقعات پر جان بوجھ کر مجرمانہ خاموشی اختیار کر لیتے ہیں۔ واضح رہے کہ ایران کے ان الزامات پر تاحال امریکی حکام کی جانب سے کوئی باضابطہ ردِعمل سامنے نہیں آیا ہے۔