پاکستانی جیو سائنس ایڈوانس ریسرچ لیبز کی بین الاقوامی سطح پر توثیق

پاکستان کی جیو سائنس ایڈوانس ریسرچ لیبز نے بین الاقوامی سطح پر توثیق حاصل کر لی ہے، جس کے بعد ان لیبز میں کیے جانے والے ٹیسٹ نتائج پوری دنیا میں قابلِ قبول ہوں گے۔ نومبر 2025 میں تعمیرِ نو کے بعد دوبارہ فعال ہونے والی یہ لیبز قلیل عرصے میں عالمی معیار کی سند حاصل کرنے میں کامیاب رہیں۔

ذرائع کے مطابق سپیشل انویسٹمنٹ فسیلیٹیشن کونسل (SIFC) کے تعاون سے جیو سائنس ایڈوانس ریسرچ لیبز نے ISO 17025 اور JORC سرٹیفیکیشن حاصل کی ہے۔ ISO 17025 لیبارٹری ٹیسٹ کے نتائج کی درستگی اور صلاحیت کی بین الاقوامی توثیق فراہم کرتا ہے، جبکہ JORC سرٹیفیکیشن کے تحت معدنیات سے متعلق ٹیسٹ نتائج عالمی سطح پر تسلیم کیے جاتے ہیں۔

حکام کے مطابق ان لیبز نے بین الصوبائی تعاون کے ساتھ ایک جامع معدنیاتی پالیسی کا مسودہ تیار کیا ہے اور ملک بھر کے معدنی وسائل کے وسیع پیمانے پر نقشہ جات بنانے میں اہم کردار ادا کیا ہے۔ ان اقدامات کا مقصد نیشنل منرل ڈیٹابیس سینٹر کے ذریعے سرمایہ کاروں کو پاکستان کے معدنی وسائل کا آن لائن اور مستند ڈیٹا فراہم کرنا ہے۔

جیولوجیکل سروے آف پاکستان کے مشیر ڈاکٹر حامد اشرف نے بتایا کہ SIFC اور حکومت کے تعاون سے ایک ہم آہنگ اور یکساں ریگولیٹری فریم ورک تیار کیا گیا ہے، جو معدنی شعبے میں شفافیت اور سرمایہ کاری کے فروغ میں معاون ثابت ہوگا۔ ڈائریکٹر جیو سروے آف پاکستان نغمہ حیدر کے مطابق ادارے میں ہیومن ریسورس ڈویلپمنٹ سینٹر قائم کیا گیا ہے، جہاں بڑی تعداد میں افراد کو تربیت دی جا چکی ہے۔

اسسٹنٹ ڈائریکٹر ماریہ اعوان نے کہا کہ لیبز میں معدنیات کی محفوظ اور درست شناخت کے لیے مختلف معدنی مراحل کا تعین کیا جاتا ہے اور ان کی ساخت و خصوصیات جدید سائنسی طریقوں سے جانچی جاتی ہیں۔

ماہرین کے مطابق جیو سائنس ایڈوانس ریسرچ لیبز کی بین الاقوامی توثیق پاکستان کے معدنی شعبے کے لیے سنگِ میل ہے، جس سے عالمی سرمایہ کاروں کا اعتماد بڑھے گا اور ملک میں معدنی وسائل کی ترقی کے نئے مواقع پیدا ہوں گے۔