انڈونیشیا وزیر تعلیم اور گوجیک ایپ کے بانی کو کرپشن پر اربوں روپے جرمانہ اور قید

انڈونیشیا کی ایک عدالت نے ملک کی معروف ترین ڈیجیٹل کمپنی ‘گوجیک’ (Gojek) کے شریک بانی اور سابق وزیر تعلیم ندیم مکرم کو سرکاری اسکولوں کے لیے کروم بک لیپ ٹاپ کی خریداری میں بدعنوانی اور اختیارات کے ناجائز استعمال کے جرم میں 10 سال قید کی سزا سنا دی ہے۔

عالمی خبر رساں ادارے کے مطابق، 41 سالہ ندیم مکرم نے عدالت میں اپنے خلاف عائد تمام الزامات کی سختی سے تردید کی تھی، تاہم عدالت نے اپنے فیصلے میں قرار دیا کہ سابق وزیر تعلیم نے اپنے عہدے کا ناجائز استعمال کیا اور واضح مفادات کے ٹکراؤ (Conflict of Interest) کے باوجود سرکاری خریداری کے عمل کو متاثر کیا۔ عدالت نے انہیں 10 سال قید کے ساتھ ساتھ 809 ارب انڈونیشین روپیہ (تقریباً 4 کروڑ 50 لاکھ امریکی ڈالر) بطور ہرجانہ ادا کرنے کا حکم بھی دیا ہے۔ جرمانے کی عدم ادائیگی کی صورت میں انہیں مزید 5 سال قید کاٹنا ہوگی۔ اس کے علاوہ ان پر ایک ارب انڈونیشین روپیہ الگ سے جرمانہ بھی عائد کیا گیا ہے، جس کی عدم ادائیگی پر مزید 190 دن قید بھگتنی ہوگی۔

 یہ مقدمہ 2021 اور 2022 کے دوران انڈونیشیا کی وزارت تعلیم کی جانب سے سرکاری اسکولوں کے لیے کروم بک لیپ ٹاپ خریدنے سے متعلق تھا۔ وزارت تعلیم نے خود 2018 میں ایک رپورٹ میں واضح کیا تھا کہ کروم بک کمپیوٹرز کے لیے مستقل انٹرنیٹ درکار ہوتا ہے، جبکہ انڈونیشیا کے متعدد دور دراز علاقوں میں انٹرنیٹ کی سہولت محدود ہے، اس لیے یہ خریداری مناسب نہیں۔ تاہم، پراسیکیوٹرز نے الزام لگایا کہ ندیم مکرم نے 2020 میں گوگل حکام سے ملاقات کے بعد خریداری کے معیار (Criteria) کو اس انداز سے تبدیل کیا کہ صرف گوگل کے کروم او ایس (Chrome OS) پر مبنی لیپ ٹاپ ہی اہل قرار پائے، جس سے گوگل کو غیر قانونی فائدہ پہنچا اور قومی خزانے کو تقریباً 12 کروڑ 50 لاکھ امریکی ڈالر کا بھاری نقصان ہوا۔

 عدالت نے اپنے فیصلے میں کہا کہ اگرچہ یہ ثابت نہیں ہوسکا کہ ندیم مکرم نے ذاتی طور پر سرکاری رقم خرد برد کی، لیکن کیونکہ وہ وزارت سنبھالنے کے بعد بھی گوجیک میں اقلیتی حصص کے مالک تھے اور گوگل اس کمپنی کے بڑے سرمایہ کاروں میں شامل تھا، اس لیے اس فیصلے میں واضح مفادات کا ٹکراؤ موجود تھا۔ دوسری جانب ندیم مکرم کا مؤقف تھا کہ گوگل کی گوجیک میں سرمایہ کاری کا اس خریداری سے کوئی تعلق نہیں تھا اور کروم بک کے انتخاب سے حکومت کے اخراجات میں کمی آئی تھی۔

عدالت سے باہر آتے ہوئے ندیم مکرم جذباتی دکھائی دیے اور انہوں نے اعلان کیا کہ وہ اس فیصلے کے خلاف اعلیٰ عدالت میں اپیل دائر کریں گے۔ فیصلہ سنائے جانے کے وقت عدالت کے باہر موجود گوجیک کے متعدد ڈرائیورز اور ان کے حامیوں نے شدید احتجاج کیا اور نعرے بازی کی۔ اس مقدمے نے انڈونیشیا میں ایک نیا سیاسی و قانونی تنازع کھڑا کر دیا ہے، جہاں انسانی حقوق کے کارکنان اسے سیاسی انتقام قرار دے رہے ہیں، وہیں تجزیہ کاروں کا کہنا ہے کہ اس فیصلے سے نوجوان پیشہ ور افراد میں یہ تاثر پیدا ہوسکتا ہے کہ حکومت میں شامل ہو کر اصلاحات لانے والوں کو قانونی مشکلات کا سامنا کرنا پڑ سکتا ہے۔

واضح رہے کہ ندیم مکرم نے 2019 میں گوجیک چھوڑ کر سابق صدر جوکو ویدودو کی حکومت میں وزیر تعلیم کا منصب سنبھالا تھا، جہاں وہ 2024 تک خدمات انجام دیتے رہے۔ گوجیک اس وقت جنوب مشرقی ایشیا کی سب سے بڑی ڈیجیٹل کمپنیوں میں شمار ہوتی ہے۔