مفاہمتی یادداشت میں طے شدہ شرائط پوری ہونے تک مزید مذاکرات میں شامل نہیں ہوں گے: ایران

ایرانی پارلیمنٹ کے اسپیکر باقر قالیباف نے ایرانی میڈیا کو ایک خصوصی انٹرویو دیتے ہوئے واضح کیا ہے کہ ایران کی جانب سے جاری موجودہ ملاقاتوں کا واحد مقصد مفاہمتی یادداشت (MoU) کے تحت کیے گئے وعدوں پر مکمل عمل درآمد کو یقینی بنانا ہے۔ انہوں نے دوٹوک انداز میں کہا کہ جب تک طے شدہ شرائط پوری نہیں ہو جاتیں، ایران کسی بھی مزید مذاکرات کا حصہ نہیں بنے گا۔

باقر قالیباف نے سیکیورٹی صورتحال پر گفتگو کرتے ہوئے بتایا کہ یہ فیصلہ کیا گیا ہے کہ ایران، امریکہ اور لبنان مل کر لبنان میں جنگ کے خاتمے کی نگرانی کے لیے ایک مشترکہ کمیٹی قائم کریں گے۔

معاشی اور سیکیورٹی امور پر بات کرتے ہوئے ایرانی اسپیکر نے انکشاف کیا کہ بحری ناکہ بندی کے خاتمے کے بعد سے اب تک ایران 40 ملین (4 کروڑ) سے زائد بیرل تیل برآمد کر چکا ہے، اور ہم اب اپنا تیل پہلے کے مقابلے میں 20 فیصد زیادہ قیمت پر فروخت کر رہے ہیں۔ انہوں نے خبردار کیا کہ ایران آبنائے ہرمز (Strait of Hormuz) میں اپنے حقوق پر کبھی کوئی سمجھوتا نہیں کرے گا۔

ان کا کہنا تھا کہ مفاہمتی یادداشت کے مطابق آبنائے ہرمز سے بغیر کسی لاگت (ٹیکس) کے گزرنے کی اجازت صرف 60 دن کے لیے ہوگی۔ انہوں نے واضح کیا کہ آبنائے ہرمز پر اصل خودمختاری صرف ایران اور عمان کی ہے، اس لیے اس آبی گزرگاہ میں بحری آمدورفت انہی انتظامات اور قوانین کے مطابق ہوگی جو ایران مقرر کرے گا۔

باقر قالیباف نے مزید کہا کہ ہم خلیج کے ساحلی ممالک کے ساتھ باہمی مشاورت اور تبادلۂ خیال کا عمل جاری رکھتے ہیں، لیکن اگر امریکہ نے ایران کو تیل فروخت کرنے سے روکنے کی کوشش کی تو پھر خطے میں کوئی بھی تیل سے فائدہ نہیں اٹھا سکے گا۔