پاکستان نے پہلی بار بین الاقوامی زیتون کونسل میں مستقل رکن کی حیثیت سے نشست سنبھال لی

پاکستان نے زیتون کی عالمی صنعت میں ایک بڑی کامیابی حاصل کرتے ہوئے بین الاقوامی زیتون کونسل (IOC) کے 123ویں اجلاس میں پہلی بار ایک مستقل رکن کی حیثیت سے اپنی باقاعدہ نشست سنبھال لی ہے۔

پرتگال میں قائم پاکستانی سفارتخانے کے ترجمان کے مطابق، وفاقی وزیر برائے قومی غذائی تحفظ و تحقیق رانا تنویر حسین نے اس تاریخی اجلاس میں پاکستانی وفد کی قیادت کی، جبکہ پرتگال میں پاکستان کی سفیر عائشہ فاروقی بھی ان کے ہمراہ موجود تھیں۔ اجلاس کے دوران بین الاقوامی زیتون کونسل کے ایگزیکٹو ڈائریکٹر، کونسل کے چیئرمین اور تمام رکن ممالک کے نمائندوں نے مستقل رکن بننے پر پاکستان کا پرتپاک خیرمقدم کیا۔

وفاقی وزیر رانا تنویر نے بین الاقوامی زیتون کونسل کا شکریہ ادا کرتے ہوئے کونسل کے مقاصد اور عالمی اہداف کے فروغ کے لیے پاکستان کے پختہ عزم کا اعادہ کیا۔

انہوں نے کونسل کے اراکین کو پاکستان میں تیزی سے ترقی کرتے ہوئے زیتون کے شعبے کے بارے میں تفصیلی طور پر آگاہ کیا۔ وفاقی وزیر نے بتایا کہ اس وقت پاکستان میں 55 ہزار 669 ایکڑ اراضی کے وسیع رقبے پر 70 لاکھ سے زائد زیتون کے درخت کاشت کیے جا چکے ہیں، جبکہ ملک بھر میں زیتون کے پیداواری کلسٹرز (Production Clusters) مسلسل وسعت اختیار کر رہے ہیں، جو مستقبل میں ملکی معیشت کے لیے گیم چینجر ثابت ہوں گے