جنوبی لبنان میں بفر زون کا قیام اسرائیل کی اہم کامیابی ہے: نیتن یاہو

اسرائیلی وزیراعظم بنجمن نیتن یاہو نے اعلان کیا ہے کہ جنوبی لبنان میں بفر زون کا قیام اسرائیل کی ایک بڑی اور اہم کامیابی ہے، اور جب تک خطرات مکمل طور پر ختم نہیں ہو جاتے، اسرائیلی فوج جنوبی لبنان سے واپس نہیں جائے گی۔

اپنے ایک بیان میں اسرائیلی وزیراعظم کا کہنا تھا کہ جب تک حزب اللہ مسلح ہے، اسرائیلی فوج جنوبی لبنان میں اپنی فوجی موجودگی برقرار رکھے گی۔ انہوں نے دعویٰ کیا کہ اسرائیل اور لبنان خطے میں امن اور سلامتی کی بحالی کے لیے کوشاں ہیں، تاہم سیکیورٹی پر کوئی سمجھوتہ نہیں کیا جائے گا اور اسے ہر صورت یقینی بنایا جائے گا۔

بنجمن نیتن یاہو نے ایران اور حزب اللہ سے مطالبہ کیا کہ وہ لبنان سے نکل جائیں۔ انہوں نے بتایا کہ سرحدی علاقوں میں اسرائیل کے خلاف حملوں کے لیے استعمال ہونے والی سرنگوں اور دیگر عسکری تنصیبات کو تباہ کرنے کے احکامات جاری کر دیے گئے ہیں۔

اسرائیلی وزیراعظم نے مزید واضح کیا کہ اسرائیل اپنی سرحد کے قریب کسی بھی مسلح گروہ یا فورس کی موجودگی کو ہرگز برداشت نہیں کرے گا اور اپنی قومی سلامتی کے تحفظ کے لیے تمام ضروری اور جارحانہ اقدامات جاری رکھے گا۔