کاہنہ حادثہ پر ایجوکیشن اتھارٹی کی رپورٹ تیار، ضلعی انتطامیہ کو ارسال

کاہنہ میں ٹیوشن سینٹر کی چھت گرنے کے المناک واقعے پر ڈسٹرکٹ ایجوکیشن اتھارٹی لاہور نے اپنی ابتدائی انکوائری رپورٹ مکمل کر کے ضلعی انتظامیہ کو ارسال کر دی ہے۔

رپورٹ میں سنسنی خیز انکشافات سامنے آئے ہیں، جس کے مطابق حادثے کا شکار ہونے والا ٹیوشن سینٹر کسی بھی سرکاری ادارے یا محکمہ تعلیم کے ساتھ رجسٹرڈ نہیں تھا بلکہ ایک نجی رہائشی گھر میں غیر قانونی طور پر قائم کیا گیا تھا۔ رپورٹ کے مطابق ایک خاتون نجی طور پر اپنے ہی رشتہ داروں اور قریبی لوگوں کے بچوں کو وہاں ٹیوشن پڑھاتی تھیں، اور حادثے کے وقت سینٹر میں 25 سے 30 بچے زیرِ تعلیم تھے۔

سی ای او (CEO) ایجوکیشن اتھارٹی لاہور طارق محمود نے اس حوالے سے واضح کیا کہ گھروں میں قائم ایسے نجی ٹیوشن سینٹرز کی رجسٹریشن کا کوئی باقاعدہ قانونی نظام موجود نہیں ہے، اور نہ ہی رہائشی گھروں میں چلنے والے یہ سینٹرز محکمہ تعلیم کے دائرۂ رجسٹریشن یا دائرہ اختیار میں آتے ہیں۔

انکوائری رپورٹ کے مطابق، اب ضلعی انتظامیہ اس المناک واقعے کی روشنی میں رہائشی علاقوں میں قائم ایسے سینٹرز کے خلاف آئندہ کے لائحہ عمل اور ممکنہ حفاظتی اقدامات کا تعین کرے گی۔