ئی اے ای اے کو ایرانی جوہری تنصیبات تک رسائی نہیں دی گئی، امریکہ مفاہمتی یادداشت کے تحت اپنے وعدے پورے کرے: اسماعیل بقائی

ایرانی وزارت خارجہ کے ترجمان اسماعیل بقائی نے منگل کے روز واضح کیا ہے کہ عالمی جوہری توانائی ایجنسی (IAEA) کو تاحال اسلامی جمہوریہ ایران کی جوہری تنصیبات کے معائنے کے لیے رسائی نہیں دی گئی ہے۔ ایرانی سرکاری خبر رساں ایجنسی ‘ارنا’ (IRNA) کے مطابق ترجمان نے یہ بیان اپنی ہفتہ وار پریس بریفنگ کے دوران دیا۔

پریس بریفنگ کے دوران اسماعیل بقائی نے عالمی جوہری ادارے کے کام کرنے کے طریقے کار پر کڑی تنقید کرتے ہوئے اس کی “خامیوں” کی نشاندہی کی۔ انہوں نے آئی اے ای اے کے ڈائریکٹر جنرل رافیل گروسی پر زور دیا کہ وہ ‘مہم جویانہ تشہیر بازی’ پر وقت ضائع کرنے کے بجائے اپنی پیشہ ورانہ ذمہ داریوں پر توجہ مرکوز کریں۔

ایک الگ سوال کے جواب میں ترجمان وزارتِ خارجہ نے امریکہ کو اس کے وعدے یاد دلاتے ہوئے کہا کہ مفاہمتی یادداشت کے پہلے پیراگراف کے تحت تمام محاذوں، بالخصوص لبنان میں جنگ کے خاتمے کے لیے امریکہ کا عزم اور کردار انتہائی اہمیت کا حامل ہے۔

اسماعیل بقائی نے مزید کہا کہ واشنگٹن کو اب اپنے وعدوں کا پاس رکھنا ہوگا اور اگر ضروری ہو تو وہ اسرائیل کو بھی مجبور کرے کہ وہ طے شدہ معاہدے کے تحت اپنی بین الاقوامی ذمہ داریوں اور وعدوں کو پورا کرے۔