اسرائیلی حملے شام کی خودمختاری کی کھلی خلاف ورزی ہیں: شامی صدر احمد الشرع

شامی صدر احمد الشرع نے جنوبی شام میں ہونے والے اسرائیلی حملوں کی شدید الفاظ میں مذمت کرتے ہوئے واضح کیا ہے کہ شام کسی بھی قسم کی غیر ملکی سازشوں کی تجربہ گاہ نہیں ہے۔

اپنے ایک اہم بیان میں صدر احمد الشرع نے کہا کہ شام اپنی خودمختاری اور علاقائی سالمیت پر کسی بھی صورت کوئی سمجھوتہ نہیں کرے گا اور اپنے قومی مفادات کے تحفظ کے لیے ہر ممکنہ اقدامات اٹھانے کا سلسلہ جاری رکھے گا۔

انہوں نے تشویش کا اظہار کرتے ہوئے کہا کہ گولان کی پہاڑیوں کے قریبی علاقوں میں ہونے والے حالیہ اسرائیلی حملوں کے باعث مقامی شہری نقل مکانی کرنے پر مجبور ہوئے ہیں، جس نے علاقے کی انسانی اور سیکیورٹی صورتحال کو مزید سنگین اور پیچیدہ بنا دیا ہے۔

شامی صدر نے مزید کہا کہ یہ اسرائیلی حملے شام کی خودمختاری پر حملہ اور بین الاقوامی قوانین کی کھلی خلاف ورزی ہیں، جس کا عالمی برادری کو فوری طور پر نوٹس لینا چاہیے۔ انہوں نے اس عزم کا اعادہ کیا کہ شامی حکومت ملک کے استحکام، یکجہتی اور علاقائی سالمیت کے دفاع کے لیے پوری طرح پرعزم ہے اور اس مقصد کے حصول کے لیے اپنی کوششیں جاری رکھے گی۔