78 برسوں میں ملک کا نظام نہیں بدلا، صرف چہرے بدلتے رہے

جماعت اسلامی کے رہنما حافظ نعیم الرحمن نے قومی کانفرنس سے خطاب کرتے ہوئے کہا کہ 78 برسوں میں ملک کا نظام نہیں بدلا، صرف چہرے بدلتے رہے۔ انہوں نے کہا کہ آئین بلدیاتی حکومتوں اور اختیارات کی منتقلی کا حکم دیتا ہے مگر اس پر عمل نہیں ہوتا، بیوروکریسی عوامی نمائندوں کے ماتحت ہونے کے بجائے انہیں اپنے ماتحت بنا چکی ہے۔

حافظ نعیم الرحمن نے سوال اٹھایا کہ ایک ہی سی ایس ایس افسر معیشت، داخلہ، خارجہ اور قانون کا ماہر کیسے ہو سکتا ہے، جبکہ جاگیردار، وڈیرے اور بیوروکریسی پورے نظام پر مسلط ہیں۔ انہوں نے کہا کہ آئین کے مطابق 5 سے 16 سال کے بچوں کو مفت اور معیاری تعلیم ریاست کی ذمہ داری ہے، مگر ملک میں 3 کروڑ سے زائد بچے اسکول سے باہر ہیں، صرف پنجاب میں یہ تعداد ایک کروڑ سے زیادہ ہے، جس پر تعلیمی ایمرجنسی کا اعلان ہونا چاہیے۔

انہوں نے حکومت سے سوال کیا کہ اگر حکومت اچھی ہے تو تعلیم اور صحت کا بحران کیوں موجود ہے، سرکاری اسکولوں اور بیسک ہیلتھ یونٹس کو این جی اوز کے حوالے کیا جا رہا ہے جو ریاست کی آئینی ذمہ داریوں سے دستبرداری ہے۔ ان کا کہنا تھا کہ اشتہارات اور چند منصوبے دکھا کر ترقی کا تاثر دیا جا رہا ہے، ہزاروں ارب کے ترقیاتی بجٹ کے باوجود عوام کو کوئی فائدہ نہیں ملا۔

حافظ نعیم الرحمن نے کہا کہ غریب پر ٹیکسوں کا بوجھ ڈال دیا گیا ہے جبکہ اشرافیہ محفوظ ہے، پیٹرول عالمی منڈی میں سستا ہونے کے باوجود پاکستان میں لیوی بڑھانے کا اعلان کیا جا رہا ہے، ایف بی آر ناکام ہو چکا ہے اور بجلی، گیس، موبائل اور پیٹرول پر ٹیکسوں نے عوام کو نچوڑ دیا ہے۔ انہوں نے زور دیا کہ کرپشن اور لوٹ مار کے نظام کا خاتمہ کیے بغیر ملک کے مسائل حل نہیں ہو سکتے۔