لانگ مارچ کا جواب ایمرجنسی یا گورنر راج نہیں ہونا چاہئے: بیرسٹر گوہر

پاکستان تحریک انصاف کے چیئرمین بیرسٹر گوہر علی خان نے کہا ہے کہ ان کی جماعت خلوصِ نیت کے ساتھ چاہتی تھی کہ حکومت کے ساتھ مذاکرات کامیاب ہوں، تاہم فی الحال دونوں فریقین اس نتیجے پر نہیں پہنچ سکے کہ بات چیت کا اگلا مرحلہ کب ہوگا۔ حکومت اور پی ٹی آئی کے مابین مذاکرات میں ڈیڈلاک کے بعد میڈیا سے گفتگو کرتے ہوئے بیرسٹر گوہر کا کہنا تھا کہ تحریکِ انصاف کا مجوزہ لانگ مارچ اپنے طے شدہ شیڈول کے مطابق ہوگا، کیونکہ پرامن احتجاج ہمارا جمہوری اور آئینی حق ہے۔

بیرسٹر گوہر نے متنبہ کیا کہ لانگ مارچ کی آڑ میں ایسے وفاقی اقدامات بالکل نہیں کیے جانے چاہئیں جن سے خیبر پختونخوا کے عوام میں نفرت، تقسیم یا تناؤ پیدا ہو، یا صوبے کے عوامی مینڈیٹ اور 18ویں ترمیم کے تحت خودمختاری کو نقصان پہنچے۔ انہوں نے واضح کیا کہ لانگ مارچ کا سیاسی جواب ایمرجنسی کے نفاذ یا گورنر راج کی شکل میں نہیں ہونا چاہیے۔ دوسری جانب وفاقی وزیر طلال چوہدری نے اپنے ردِعمل میں دعویٰ کیا کہ مذاکرات میں متعدد سیاسی امور پر اتفاقِ رائے ہو چکا تھا لیکن خیبر پختونخوا حکومت کے نیشنل ایکشن پلان پر عمل درآمد سے انکار کے باعث بات چیت آگے نہ بڑھ سکی۔