ملک کو انتشار سے بچانے کی ہر ممکن کوشش کی، پی ٹی آئی وفد دہشت گردی پر نہیں مانا: امیر مقام و شیری رحمان

حکومتی وفد نے اپوزیشن کے ساتھ مذاکرات کے بعد میڈیا سے گفتگو کرتے ہوئے کہا ہے کہ وفاق نے ملک کو سیاسی انتشار سے بچانے کے لیے ہر ممکن کوشش کی، تاہم پی ٹی آئی کا وفد بیٹھک چھوڑ کر چلا گیا۔ وفاقی وزیر امیر مقام نے بتایا کہ گفتگو کے دروازے ہمیشہ کھلے رہتے ہیں اور مذاکرات کسی بھی وقت ہو سکتے ہیں، لیکن اپوزیشن وفد دہشت گردی سے متعلق اہم معاملات اور انسدادِ دہشت گردی کے اقدامات پر کسی صورت متفق نہیں ہوا، جس کے باعث گفتگو کا سلسلہ منقطع ہوا۔

اس موقع پر پاکستان پیپلز پارٹی کی سینئر رہنما شیری رحمان نے میڈیا کو بتایا کہ حکومتی وفد نے مسلسل دو دنوں تک ملک و قوم مفاد اور سیاسی استحکام کے لیے ایڑی چوٹی کا زور لگایا۔ ہم نے ان کے ساتھ انتہائی مستقل مزاجی اور صبر سے گفتگو کی اور ان کے مطالبات کو مدنظر رکھتے ہوئے مذاکراتی مسودہ (ڈرافٹ) چار مرتبہ تبدیل بھی کیا، جس کے لیے وہ اپنی مرکزی قیادت سے بھی مسلسل رابطے میں رہے۔ تاہم پی ٹی آئی کی جانب سے لچک کا مظاہرہ نہ کرنے پر معاملہ حتمی شکل نہ اختیار کر سکا۔