سہیل آفریدی نے پی ٹی آئی کے لانگ مارچ کا روٹ میپ جاری کر دیا

خیبرپختونخوا کے وزیراعلیٰ سہیل خان آفریدی نے سوشل میڈیا پلیٹ فارم ‘ایکس’ پر اپنے بیان کے ذریعے آج سے شروع ہونے والے لانگ مارچ کے پہلے مرحلے کا باقاعدہ تفصیلی روٹ میپ جاری کر دیا ہے۔ وزیراعلیٰ کے مطابق لانگ مارچ کا آغاز چار اکتوبر کو دوپہر ایک بجے گنڈی چوک، لکی مروت سے ہو رہا ہے، جہاں ٹانک، ڈیرہ اسماعیل خان، شمالی و جنوبی وزیرستان، بنوں اور لکی مروت کے قافلے شامل ہوں گے اور رات کو کرک کے قریب پڑاؤ ڈالا جائے گا۔

روٹ میپ کے مطابق پانچ اکتوبر کو کرک سے روانگی کے بعد قافلہ رات کوہاٹ کے قریب قیام کرے گا، جبکہ چھ اکتوبر کو کوہاٹ، ہنگو، کرم اور اورکزئی کے عوام شامل ہوں گے اور متنی (پشاور) کے قریب رات گزاریں گے۔ سات اکتوبر کو خیبر اور پشاور کے اضلاع کے استقبالیہ قافلے شامل ہو کر رات چارسدہ انٹرچینج پر بسر کریں گے، اور آٹھ اکتوبر کو صوبے بھر سے تمام تر قافلے خیر آباد کے مقام پر جمع ہو کر آئندہ کا حتمی لائحہ عمل طے کریں گے۔ دوسری جانب وفاقی مشیر رانا ثناء اللہ نے اپنے مؤقف کا اعادہ کرتے ہوئے کہا ہے کہ تحریکِ انصاف کے لانگ مارچ کو کسی صورت اسلام آباد کی حدود میں داخل ہونے کی اجازت نہیں دی جائے گی۔