پی ٹی آئی دہشت گردی پر تعاون سے انکاری، لانگ مارچ اسلام آباد داخل نہیں ہونے دیں گے: رانا ثناء اللہ

وفاقی حکومت کے رہنما اور مشیر رانا ثناء اللہ نے گفتگو کے حوالے سے حکومتی نقطہ نظر واضح کرتے ہوئے کہا ہے کہ تحریکِ انصاف کے ساتھ مذاکرات کا بنیادی مرکز خیبر پختونخوا کے حالات اور امن و امان کی صورتحال تھی۔ ہمارا اہم مطالبہ تھا کہ صوبائی حکومت دہشت گردی کے خلاف جنگ میں اپنا آئینی اور قانونی کردار ادا کرے، لیکن پی ٹی آئی قیادت اس معاملے پر تعاون کے لیے کسی صورت تیار نہیں ہوئی۔

رانا ثناء اللہ کا کہنا تھا کہ بانی پی ٹی آئی سے ملاقاتوں اور سہولیات کا معاملہ ثانوی تھا جس پر حکومت نے پہلے ہی رضا مندی ظاہر کر دی تھی، تاہم دہشت گردی جیسے اہم ترین قومی معاملے پر صوبائی حکومت کا انکاری رویہ سامنے آیا۔ انہوں نے ایک بار پھر اپنے موقف کا اعادہ کرتے ہوئے خبردار کیا کہ پی ٹی آئی کے لانگ مارچ کو کسی بھی قیمت پر اسلام آباد کی حدود میں داخل ہونے کی اجازت نہیں دی جائے گی۔ انہوں نے واضح کیا کہ اگر اپوزیشن دہشت گردی کے خلاف اقدامات میں تعاون پر آمادہ ہوتی ہے تو مذاکرات کے راستے کھلے رہیں گے۔