حسن جہانگیر نے ریکھا کے مبینہ محبت نامے پر خاموشی توڑ دی

پاکستان کے معروف اور عالمی شہرت یافتہ گلوکار حسن جہانگیر نے بھارتی اداکارہ ریکھا کی جانب سے مبینہ طور پر محبت نامہ موصول ہونے کے سوال پر انتہائی دلچسپ ردِعمل دیا ہے۔

ایک حالیہ پوڈکاسٹ میں گفتگو کے دوران جب میزبان نے ان سے سوال کیا کہ کیا ان کے بلاک بسٹر گانے “ہوا ہوا” کی بے پناہ کامیابی کے بعد بالی ووڈ کی لیجنڈری اداکارہ ریکھا نے انہیں محبت خط لکھا تھا؟ اس پر حسن جہانگیر نے مسکراتے ہوئے جواب دیا کہ “محبت کسی بھی عمر میں ہو سکتی ہے، لیکن کچھ باتیں راز ہی رہنے دینی چاہئیں”۔

گلوکار نے بھارت میں ملنے والی محبت کا تذکرہ کرتے ہوئے کہا کہ انہیں وہاں کبھی کسی مشکل کا سامنا نہیں کرنا پڑا۔ انہوں نے بتایا کہ مادھوری ڈکشٹ، گووندا، شاہ رخ خان، سلمان خان اور متھون چکرورتی ان کے بہترین دوست ہیں اور ان سے آج بھی رابطہ رہتا ہے۔

حسن جہانگیر نے اپنی زندگی کے ایک بڑے افسوس کا ذکر کرتے ہوئے انکشاف کیا کہ بھارت میں قیام کے دوران انہیں بطور ہیرو کئی فلموں کی پیشکش ہوئی تھی، لیکن انہوں نے بالی ووڈ کی 7 بڑی فلموں کی آفرز مسترد کر دیں اور پاکستان واپس آ گئے۔ ان کا کہنا تھا کہ ان فلموں میں نیلم اور مادھوری ڈکشٹ جیسی صفِ اول کی اداکارائیں شامل تھیں اور ممکن ہے کہ اگر وہ ان میں کام کرتے تو وہ فلمیں بڑی کامیاب ثابت ہوتیں