طاقتور طوفان سعودی عرب اور خلیجی ممالک کی جانب گامزن، شدید بارش اور آندھی کا الرٹ جاری

ریاض: ماہرین موسمیات نے خبردار کیا ہے کہ ایک طاقتور طوفان سعودی عرب اور خلیجی خطے کی جانب بڑھ رہا ہے، جس کے باعث موسلا دھار بارش، شدید آندھی اور گرد آلود ہواؤں کا خدشہ ہے۔

ماہرین کے مطابق ہفتے کے اختتام تک مختلف علاقے شدید بارشوں کی لپیٹ میں آ سکتے ہیں جبکہ آج اور جمعرات کے دوران ہوا کی رفتار ساٹھ کلومیٹر فی گھنٹہ تک پہنچنے کا امکان ہے۔

سعودی محکمہ موسمیات نے پیش گوئی کی ہے کہ حد نگاہ متاثر ہو سکتی ہے جبکہ ساحلی علاقوں میں سمندری لہریں غیر معمولی طور پر بلند ہو سکتی ہیں، جن کی اونچائی ڈھائی میٹر سے بھی تجاوز کر سکتی ہے۔

دوسری جانب متحدہ عرب امارات میں بھی طوفانی بارشوں کے باعث نشیبی علاقوں اور گھروں میں پانی داخل ہونے کا خدشہ ظاہر کیا جا رہا ہے، جس کے پیش نظر شہری احتیاطی تدابیر اختیار کر رہے ہیں۔

اماراتی محکمہ اوقاف نے شہریوں سے اپیل کی ہے کہ وہ خراب موسمی حالات کے دوران نماز گھروں میں ادا کریں تاکہ غیر ضروری نقل و حرکت سے بچا جا سکے۔