سونے اور چاندی کی قیمتوں میں مسلسل چوتھے روز نمایاں کمی

عالمی بلین مارکیٹ میں قیمتوں میں گراوٹ کے باعث پاکستان میں سونے کی قیمتوں میں مسلسل چوتھے روز نمایاں کمی ریکارڈ کی گئی ہے۔ بین الاقوامی مارکیٹ میں فی اونس سونے کی قیمت 52 ڈالر کمی کے بعد 4 ہزار 714 ڈالر کی سطح پر آ گئی، جس کے براہ راست اثرات مقامی صرافہ بازاروں پر بھی مرتب ہوئے۔

مقامی سطح پر 24 قیراط فی تولہ سونے کی قیمت میں 5 ہزار 200 روپے کی بڑی کمی ہوئی، جس کے بعد سونا 4 لاکھ 93 ہزار 762 روپے فی تولہ پر پہنچ گیا ہے۔ اسی طرح 10 گرام سونے کی قیمت 4 ہزار 458 روپے کم ہو کر 4 لاکھ 23 ہزار 321 روپے ریکارڈ کی گئی۔

سونے کے ساتھ ساتھ چاندی کی قیمتوں میں بھی مندی کا رجحان رہا۔ فی تولہ چاندی 225 روپے کی کمی کے بعد 8 ہزار 99 روپے پر آ گئی، جبکہ 10 گرام چاندی کی قیمت 193 روپے کمی کے بعد 6 ہزار 943 روپے ہو گئی ہے۔ معاشی ماہرین کے مطابق عالمی مارکیٹ میں اتار چڑھاؤ اور ڈالر کی قدر میں تبدیلی سونے کی قیمتوں پر مسلسل اثر انداز ہو رہی ہے۔