کراچی؛ سونے اور چاندی کی قیمتوں کو پر لگ گئے، فی تولہ سونا ریکارڈ سطح پر پہنچ گیا

کراچی سمیت ملک بھر کی صرافہ مارکیٹوں میں سونے اور چاندی کی قیمتوں میں اضافے کا رجحان برقرار ہے۔ مقامی مارکیٹ میں فی تولہ سونے کی قیمت میں 1 ہزار روپے کا اضافہ ریکارڈ کیا گیا ہے، جس کے بعد سونا 4 لاکھ 92 ہزار 362 روپے کی بلند ترین سطح پر پہنچ گیا ہے۔

اسی طرح 10 گرام سونے کی قیمت میں بھی 858 روپے کا اضافہ ہوا ہے اور اب یہ 4 لاکھ 22 ہزار 121 روپے میں فروخت ہو رہا ہے۔ مقامی مارکیٹ میں قیمتوں میں اس اضافے کی بنیادی وجہ عالمی منڈی میں سونے کی قیمتوں میں تیزی بتائی جا رہی ہے، جہاں فی اونس سونا 10 ڈالر مہنگا ہو کر 4700 ڈالر کی سطح پر آ گیا ہے۔

دوسری جانب چاندی کے نرخوں میں بھی اضافہ دیکھا گیا ہے۔ چاندی کی فی تولہ قیمت 65 روپے بڑھ کر 9204 روپے ہو گئی ہے۔ معاشی ماہرین کے مطابق عالمی سطح پر بڑھتی ہوئی طلب اور معاشی غیر یقینی صورتحال کے باعث قیمتی دھاتوں کی قیمتوں میں مسلسل اضافہ دیکھنے میں آ رہا ہے۔