عالمی اور مقامی مارکیٹس میں سونے کی قیمتوں میں کمی

عالمی اور مقامی صرافہ بازاروں میں سونے اور چاندی کی قیمتوں میں ایک بار پھر بڑی گراوٹ دیکھی گئی ہے، جس کے بعد سونے کی قیمت پانچ لاکھ روپے کی سطح کے قریب پہنچ گئی ہے۔ آل پاکستان صرافہ جیمز اینڈ جیولرز ایسوسی ایشن کے مطابق، مقامی مارکیٹ میں 24 کیرٹ فی تولہ سونے کی قیمت میں 4 ہزار 900 روپے کی نمایاں کمی ہوئی، جس کے بعد نئی قیمت 5 لاکھ 1 ہزار 162 روپے مقرر کی گئی ہے۔ اسی طرح 10 گرام سونے کی قیمت بھی 4 ہزار 201 روپے کمی کے بعد 4 لاکھ 29 ہزار 665 روپے پر آگئی ہے۔

چاندی کی قیمتوں میں بھی کمی کا رجحان رہا، جہاں فی تولہ چاندی 145 روپے سستی ہوکر 8 ہزار 417 روپے کی سطح پر آگئی ہے۔ عالمی مارکیٹ میں بھی سونے کی قیمتوں پر دباؤ رہا، جہاں فی اونس سونا 49 ڈالر کی کمی کے بعد 4 ہزار 788 ڈالر پر ٹریڈ ہو رہا ہے۔ معاشی ماہرین کے مطابق عالمی سطح پر ڈالر کی قدر میں اتار چڑھاؤ اور سرمایہ کاروں کے بدلتے ہوئے رجحانات ان قیمتوں میں کمی کی بڑی وجہ ہیں۔