بھارتی دو نوجوانوں پر قسمت کی دیوی مہربان، لاکھ پتی بنا دیا

بھارت کے صوبے مدھیہ پردیش کے ضلع پنا میں دو بچپن کے دوست ستیش کھاتک (24) اور ساجد محمد (23) کو لیز پر حاصل کھیت میں کام کے دوران 15.3 قیراط کا ہیرا ملا ہے۔ پنا ڈائمنڈ آفس کی جانچ کے مطابق یہ ہیرا اصلی ہے اور اس کی مارکیٹ ویلیو تقریباً 50 سے 60 لاکھ بھارتی روپے (تقریباً 1.8 کروڑ پاکستانی روپے) ہے۔

ذرائع کے مطابق یہ ہیرا حکومتی نیلامی کے ذریعے فروخت کیا جائے گا، جس میں دریافت کنندگان کو 88 فیصد اور حکومت کو 12 فیصد رقم ملے گی۔ پنا ضلع میں ہر تین ماہ بعد حکومتی نگرانی میں ہیرے کی نیلامی کی جاتی ہے۔

ستیش اور ساجد دونوں غریب خاندانوں سے تعلق رکھتے ہیں، ایک قصائی اور دوسرا پھل فروش ہے، اور انہوں نے کہا کہ یہ رقم اپنی زندگی بہتر بنانے کے لیے استعمال کریں گے، خصوصاً اپنی بہنوں کی شادی کے لیے۔ ضلع پنا کو ڈائمنڈ بیلٹ کے طور پر جانا جاتا ہے اور یہاں ماضی میں بھی ہیرے کی دریافت ہوتی رہی ہے۔