پولیس نے لڑکی کو ہراساں کرنے والا روبوٹ تحویل میں لے لیا

جرمنی کے شہر کولون (Cologne) میں ایک عجیب و غریب اور انوکھا واقعہ پیش آیا ہے جہاں چار فٹ لمبے سرخ اور سنہری رنگ کے ایک ہیومنائڈ روبوٹ کی جانب سے 16 سالہ لڑکی کو مبینہ طور پر ہراساں کرنے اور نازیبا حرکات کرنے پر پولیس نے روبوٹ کو اپنی تحویل میں لے لیا ہے۔

غیر ملکی میڈیا کے مطابق یہ واقعہ ہفتے کی رات تقریباً بارہ بجے کے قریب ایک فاسٹ فوڈ آؤٹ لیٹ کے باہر پیش آیا۔ روبوٹ اچانک پیچھے سے آیا، لڑکی کو چھوا اور نامناسب حرکات کرنے لگا جس پر خوفزدہ ہو کر لڑکی نے شور مچا دیا اور وہاں سے ہٹ گئی۔ پولیس نے اطلاع ملنے پر فوری کارروائی کرتے ہوئے کچھ ہی دیر بعد مذکورہ روبوٹ کو ایک کار کی ڈگی سے برآمد کر کے قبضے میں لے لیا، جبکہ تفتیش کے لیے دو موبائل فون بھی تحویل میں لے لیے گئے ہیں۔

حکام نے روبوٹ کے 16 سالہ مالک اور اس کے 19 سالہ ساتھی کے خلاف باضابطہ تحقیقات کا آغاز کر دیا ہے۔ ابتدائی اطلاعات کے مطابق یہ نوجوان سوشل میڈیا پر اس پورے واقعے کی لائیو اسٹریمنگ (براہِ راست نشریات) کر رہے تھے اور اس پر ہنسی مذاق کر رہے تھے۔ تفتیش کار اس زاویے سے بھی جانچ پڑتال کر رہے ہیں کہ آیا روبوٹ کو دور بیٹھ کر کسی ریموٹ یا ایپ کے ذریعے کنٹرول کیا جا رہا تھا۔ واضح رہے کہ اس سے قبل بھی اسی روبوٹ کو جعلی مونچھوں، سنہری چین اور سفید بنیان کے ساتھ مختلف عوامی مقامات پر خواتین کو تنگ کرتے ہوئے دیکھا جا چکا ہے۔