ڈرگ پرائسنگ کابینہ کمیٹی کا اجلاس: ادویات کی قیمتوں سے متعلق فیصلے شفاف اور شواہد کی بنیاد پر کرنے کی ہدایت

وزیرِ خزانہ محمد اورنگزیب کی زیرِ صدارت ڈرگ پرائسنگ سے متعلق کابینہ کمیٹی کا اہم اجلاس منعقد ہوا، جس میں وزیرِ صحت مصطفیٰ کمال اور وزیرِ دفاعی پیداوار محمد رضا حیات ہراج بھی شریک ہوئے۔ اعلامیے کے مطابق اجلاس میں نئی ادویات کی قیمتوں کے تعین اور ہارڈ شپ درخواستوں کا جائزہ لیا گیا، جبکہ ڈریپ (DRAP) کی جانب سے ضروری ادویات کی دستیابی اور نرخوں سے متعلق سفارشات پیش کی گئیں۔ اس موقع پر وزیرِ خزانہ نے ادویات کی قیمتوں کے فیصلوں کو شفاف، شواہد پر مبنی اور مشاورت سے مشروط کرنے پر زور دیا۔ انہوں نے ہدایت کی کہ اہم ادویات کے نرخوں سے متعلق وجوہات عوام کے سامنے واضح کی جائیں اور ضروری ادویات کی منصفانہ و قابلِ برداشت قیمتوں اور فارماسیوٹیکل سپلائی کے استحکام میں توازن قائم رکھا جائے۔