وفاق نے صوبوں سے نئے ترقیاتی ایجنڈے، پہلےمنصوبوں پر عملدرآمد رپورٹ طلب کرلی

وفاقی حکومت نے صوبوں سے نئے ترقیاتی ایجنڈے اور پرانے منصوبوں پر عملدرآمد کی جامع رپورٹ طلب کر لی ہے، جبکہ وفاقی وزیر منصوبہ بندی کی صدارت میں صوبائی وزراء کا 4 واں اجلاس بھی جلد طلب کرنے کا فیصلہ کیا گیا ہے۔ پلاننگ کمیشن کی جانب سے پنجاب، سندھ، بلوچستان، خیبر پختونخوا، آزاد کشمیر اور گلگت بلتستان کو جاری مراسلے میں ہدایت کی گئی ہے کہ گزشتہ اجلاس کے فیصلوں پر عملدرآمد کی رپورٹ 25 جولائی تک لازمی جمع کرائی جائے۔ اس کے علاوہ وفاق نے زرعی سہولیات، ہیپاٹائٹس سی کے خاتمے، ذیابیطس، آبادی کنٹرول، برآمدات میں اضافے کے ضلعی منصوبوں اور غیر قانونی ہاؤسنگ سوسائٹیوں کی روک تھام سے متعلق جاری کارکردگی پر تفصیلی ورکنگ پیپرز طلب کیے ہیں جن کا جائزہ آئندہ اہم بین الصوبائی اجلاس میں لیا جائے گا۔