بھارت پاکستانی مواد کو نیٹ فلکس پر نہیں دیکھنا چاہتا: فیصل قریشی

پاکستان کے معروف اور مقبول اداکار فیصل قریشی نے انکشاف کیا ہے کہ بھارتی ناظرین اور مارکیٹ پاکستانی مواد کو نیٹ فلکس پر جگہ نہیں ملنے دینا چاہتے، جبکہ پاکستان میں نیٹ فلکس کی محدود تجارتی اہمیت اور صارفین کا رویہ بھی اس کی ایک بڑی وجہ ہے۔ ایک حالیہ پوڈ کاسٹ میں گفتگو کرتے ہوئے فیصل قریشی نے کہا کہ نیٹ فلکس ایسا مواد پسند کرتا ہے جو معاشرے کے مثبت اور منفی دونوں پہلوؤں کو حقیقت پسندانہ انداز میں پیش کرے، لیکن ہمارے ہاں فلم ساز ہر موضوع پر کھل کر کام نہیں کر سکتے کیونکہ تلخ حقیقت دکھانے پر انہیں مشکلات کا سامنا کرنا پڑتا ہے۔ انہوں نے پاکستانی مواد کی عدم موجودگی کی ایک اور بڑی وجہ مقامی صارفین کے رجحان کو قرار دیتے ہوئے کہا کہ اکثر پاکستانی اپنی ذاتی سبسکرپشن خریدنے کے بجائے دوستوں یا بیرونِ ملک مقیم رشتہ داروں کے اکاؤنٹس شیئر کرتے ہیں، جس سے نیٹ فلکس کو پاکستان سے وہ مالی فائدہ حاصل نہیں ہوتا جو بھارت جیسے بڑے ممالک سے ملتا ہے۔ فیصل قریشی کے مطابق، ہمارے ہاں فلم کی ریلیز پر سب سے پہلا سوال یہ ہوتا ہے کہ یہ یوٹیوب پر کب آئے گی، جو ڈیجیٹل مواد کے حوالے سے ہمارے معاشرتی رویے کی عکاسی کرتا ہے۔