صرف 11 منٹ کی اضافی نیند جان لیوا کیفیت سے بچا سکتی ہے: تحقیق

سڈنی/لندن: آسٹریلیا، برازیل اور چلی کے محققین کی ایک مشترکہ ٹیم نے اپنی حالیہ تحقیق میں انکشاف کیا ہے کہ روزانہ کی روٹین میں محض 11 منٹ کی اضافی نیند دل کے دورے (Heart Attack) کے خطرات میں واضح کمی کا باعث بن سکتی ہے۔ تحقیق کے مطابق، کم صحت مندانہ طرزِ زندگی گزارنے والے افراد اگر اپنی عادات میں معمولی تبدیلی لائیں تو وہ طویل اور صحت مند زندگی پا سکتے ہیں۔

سائنس دانوں نے 53 ہزار درمیانی عمر کے برطانوی افراد کی نیند اور ورزش کی عادات کا جائزہ لینے کے لیے اسمارٹ واچ جیسی ‘ویئربل ٹیکنالوجی’ (Wearable Tech) کا استعمال کیا۔ تحقیق میں معلوم ہوا کہ روزانہ 11 منٹ کی اضافی نیند، ساڑھے چار منٹ کی ورزش اور 60 گرام سبزی کا استعمال سنجیدہ نوعیت کے قلبی امراض کے خطرات کو 10 فیصد تک کم کر دیتا ہے۔

تاہم، تحقیق کے نتائج یہ بھی بتاتے ہیں کہ اگر کوئی شخص 8 گھنٹے کی مکمل نیند، 40 منٹ کی ورزش اور متوازن غذا کو اپنا معمول بنا لے، تو دل کے امراض کا خطرہ 57 فیصد تک کم ہو سکتا ہے۔ ماہرین کا کہنا ہے کہ یہ مطالعہ ثابت کرتا ہے کہ صحت میں بہتری کے لیے ہمیشہ بڑی تبدیلیوں کی ضرورت نہیں ہوتی، بلکہ چھوٹی چھوٹی کوششیں بھی بڑے نتائج دے سکتی ہیں۔