’ایسا استقبال کہیں نہیں ہوا‘، عمران ہاشمی پاکستانیوں کی مہمان نوازی کے معترف

بالی ووڈ کے اسٹار اداکار عمران ہاشمی نے پاکستان میں ملنے والی بے پناہ محبت اور روایتی مہمان نوازی کو یاد کرتے ہوئے کہا ہے کہ لاہور کا دورہ ان کی زندگی کا ایک شاندار اور ناقابلِ فراموش تجربہ تھا۔

ایک بھارتی پوڈکاسٹ میں گفتگو کرتے ہوئے عمران ہاشمی نے ماضی کی یادیں تازہ کیں اور بتایا کہ اپنی سپر ہٹ فلم ’آوارہ پن‘ کی ریلیز کے موقع پر وہ نامور فلم میکر مہیش بھٹ کے ہمراہ لاہور آئے تھے، جہاں پاکستانی مداحوں نے ان کا جس والہانہ انداز میں شاندار استقبال کیا، وہ اسے کبھی نہیں بھول سکتے۔ ان کے مطابق پاکستان میں ملنے والے پیار اور لاجواب مہمان نوازی نے انہیں اور ان کی پوری ٹیم کو حیران کر دیا تھا۔

عمران ہاشمی نے مزید کہا کہ پاکستان میں ہندی فلموں کے شائقین کی ایک بہت بڑی تعداد موجود ہے اور وہاں کے لوگ بھارتی سینما اور کہانیوں کو بے حد پسند کرتے ہیں۔

اپنی ایک اور بلاک بسٹر فلم ’جنت‘ کی شوٹنگ اور ریلیز کے دوران پیش آنے والے مداحوں کے بے قابو ہجوم کے واقعے کا ذکر کرتے ہوئے بالی ووڈ اسٹار نے کہا کہ پاکستانی مداحوں کا جنون اور جوش و خروش اس بات کا منہ بولتا ثبوت ہے کہ وہاں ان کی فلموں اور اداکاری کو کس قدر پذیرائی حاصل رہی ہے۔ ان کا کہنا تھا کہ سرحد پار سے ملنے والی یہ محبت کسی بھی فنکار کے لیے سب سے بڑا سرمایہ ہوتی ہے۔