وسط مدتی انتخابات کیلئے ایلون مسک کی بھاری مالی معاؤنت بھی کام نہ آئی

دنیا کے امیر ترین شخص ایلون مسک کی جانب سے امریکی وسط مدتی انتخابات میں کی جانے والی کروڑوں ڈالر کی مالی معاونت خاطر خواہ نتائج حاصل کرنے میں ناکام رہی ہے۔ خبر ایجنسی کے مطابق ایلون مسک نے انتخابی مہمات پر مجموعی طور پر 44 کروڑ 60 لاکھ ڈالر کی خطیر رقم خرچ کی، جس کا بڑا حصہ ریپبلکن امیدواروں اور انتخابی کمیٹیوں کو فراہم کیا گیا۔ انہوں نے اپنی کمپنیوں سپیس ایکس اور ٹیسلا کے مرکز ٹیکساس کو انتخابی سرمایہ کاری کا مرکزی میدان بنایا، جہاں صرف ایک ڈیموکریٹک امیدوار کے خلاف انتخابی سرگرمیوں پر 4 کروڑ 70 لاکھ ڈالر اور ستمبر کے مہینے میں ریپبلکن سینیٹ کمیٹی کو 15 کروڑ 80 لاکھ ڈالر دیے۔ ایلون مسک نے ٹیکساس میں کل 22 کروڑ 40 لاکھ ڈالر نچھاور کیے، تاہم اس بے مثال مالی امداد کے باوجود وہ ریپبلکنز کو درکار انتخابی کامیابی دلوانے میں ناکام رہے۔