ڈیجیٹل ذرائع حق خودارادیت کی تحریکوں کو دبانے کیلئے استعمال کئے جا رہے: پاکستان

پاکستان نے عالمی ڈیجیٹل منظرنامے اور ٹیکنالوجی کے غیر متوازن استعمال پر گہری تشویش کا اظہار کرتے ہوئے خبردار کیا ہے کہ بین الاقوامی ٹیکنالوجی کمپنیاں اور قابض قوتیں سنسرشپ، الگورتھم کی ہیرا پھیری اور ڈیجیٹل نگرانی کو ایک منظم ہتھیار کے طور پر استعمال کر کے عوام کی حقِ خودارادیت کے لیے جاری جائز تحریکوں کو دبانے کی کوشش کر رہی ہیں۔

اقوام متحدہ میں پاکستان کے پریس قونصلر امانت علی نے جنرل اسمبلی کی چوتھی کمیٹی برائے خصوصی سیاسی و نوآبادیاتی امور میں اطلاعاتی امور کے جائزے کے موقع پر خطاب کرتے ہوئے کہا کہ مقبوضہ علاقوں میں انٹرنیٹ کی بندش، ڈیجیٹل سنسرشپ اور سخت میڈیا قوانین کے ذریعے مظلوم عوام کی آواز کو دبایا جا رہا ہے تاکہ زمینی حقائق کو مسخ کر کے ان کی جدوجہد کو غیر معتبر بنایا جا سکے۔ انہوں نے عالمی برادری پر زور دیا کہ کثیر القومی ٹیک کمپنیوں کے غیر شفاف الگورتھمز اور پاور کنٹرول کی جواب دہی کے لیے ایک مؤثر عالمی فریم ورک تیار کیا جائے۔

پاکستانی مندوب نے اسلاموفوبیا، نسل پرستی اور غیر ملکیوں سے نفرت کے بڑھتے ہوئے رجحانات کی سدِباب کے لیے بین الاقوامی تعاون پر زور دیا۔ انہوں نے مصنوعی ذہانت (AI) کے غلط استعمال اور ڈس انفارمیشن کے خطرات سے بھی خبردار کیا، جبکہ اقوام متحدہ کے شعبہ اطلاعات (DGC) سے کثیر اللسانی نظام کو فروغ دینے اور مقامی پریس مراکز کو بااختیار بنانے کا مطالبہ کیا۔