دعا لیپا کی پرتگال میں ممنوعہ کتابوں کی مستقل لائبریری قائم

عالمی شہرت یافتہ پاپ گلوکارہ دعا لیپا نے اپنی شادی کے محض ایک ہفتے بعد پرتگال میں ممنوعہ اور سنسر کی جانے والی کتابوں پر مشتمل ایک خصوصی لائبریری قائم کرنے کا اعلان کیا ہے۔ ‘منی فیسٹو لائبریری’ کا افتتاح “منی فیسٹو لائبریری” کے نام سے قائم کی جانے والی یہ منفرد لائبریری دعا لیپا کے 2021 میں شروع کیے گئے بک کلب ‘سروس 95’ (Service95) کا عملی اور مستقل حصہ ہوگی۔ اس لائبریری کا باقاعدہ افتتاح پرتگال کے تاریخی شہر پورٹو میں واقع مشہور “لیوراریا لیلو” بک سٹور میں کیا جا رہا ہے۔ یہ منصوبہ لیوراریا لیلو بک سٹور کی 120ویں سالگرہ کی تقریبات کا حصہ ہے، تاہم افتتاحی تقریب کے بعد بھی یہ لائبریری مستقل طور پر اسی مقام پر موجود رہے گی۔

آزادیِ اظہارِ رائے کے لیے ایک پلیٹ فارم اس موقع پر گفتگو کرتے ہوئے دعا لیپا نے کہا:”جب میں نے سروس 95 بک کلب کی بنیاد رکھی تو میرا مقصد دنیا بھر کے مصنفین اور قارئین کے لیے ایک ایسا پلیٹ فارم فراہم کرنا تھا جہاں وہ آزادانہ طور پر خیالات کا تبادلہ کر سکیں۔ کتابیں ہمیں ایک دوسرے کے قریب لاتی ہیں، لیکن افسوس کہ ہر کوئی اس آزادی کا حامی نہیں۔”

انہوں نے اس منصوبے کو اپنے خوابوں کی شراکت داری قرار دیتے ہوئے بتایا کہ لائبریری میں 100 ایسی منتخب کتابیں شامل کی گئی ہیں جو یا تو اہم سوالات اٹھاتی ہیں یا خود پابندیوں کا نشانہ بنتی رہی ہیں۔ ان میں شامل کئی مصنفین نے اپنے خیالات کی قیمت اپنی جان دے کر ادا کی۔ اس خصوصی مجموعے میں مارگریٹ ایٹ وڈ کا معروف ناول The Handmaid’s Tale، ریجینلڈ ڈوین بیٹس کی Felon سمیت اولگا توکارچوک جیسے نوبل انعام یافتہ مصنفین کی تخلیقات بھی شامل کی گئی ہیں۔ پاپ سٹار کا کہنا تھا کہ یہ لائبریری ان کتابوں اور مصنفین کو خراجِ تحسین ہے جنہوں نے طاقت اور جبر کے ڈھانچوں کو بے نقاب کیا۔

دعا لیپا نے قارئین کو دعوت دیتے ہوئے کہا کہ وہ یہاں آئیں، ان کتابوں کو دیکھیں اور خود فیصلہ کریں، کیونکہ بعض اوقات سب سے انقلابی کام ایک کتاب پڑھنا اور اس پر گفتگو کرنا ہوتا ہے۔ واضح رہے کہ کتابیں دعا لیپا کی ذاتی زندگی میں بھی گہرا اثر رکھتی ہیں۔ ان کی اپنے شوہر اور اداکار کیلم ٹرنر سے پہلی ملاقات بھی ایک بار (bar) میں ہوئی تھی جہاں دونوں ہرمن ڈیاز کا ناول Trust پڑھ رہے تھے۔ دعا لیپا رواں برس انٹرنیشنل بکر پرائز کی دسویں سالگرہ کی تقریب میں کلیدی خطاب بھی کر چکی ہیں۔