اسحاق ڈار کی شاہِ اردن سے ملاقات، فلسطین اور مشرقِ وسطیٰ کی صورتحال پر تبادلۂ خیال

نائب وزیراعظم اور وزیر خارجہ سینیٹر اسحاق ڈار نے اردن کے دارالحکومت عمان میں یروشلم سے متعلق وزارتی اجلاس کے موقع پر دیگر وزرائے خارجہ اور اعلیٰ شخصیات کے ہمراہ ہاشمی مملکتِ اردن کے فرمانروا شاہ عبداللہ دوم بن الحسین سے اہم ملاقات کی ہے۔ ملاقات کے دوران اسحاق ڈار نے صدر مملکت آصف علی زرداری، وزیراعظم محمد شہباز شریف، چیف آف ڈیفنس فورسز فیلڈ مارشل سید عاصم منیر اور پاکستان کے عوام کی جانب سے نیک تمناؤں اور خیرسگالی کے پیغامات اردن کے بادشاہ کو پہنچائے۔ اس موقع پر شاہ عبداللہ دوم نے بھی پاکستانی قیادت اور عوام کے لیے نیک خواہشات کا اظہار کیا۔ وزیر خارجہ نے بیت المقدس میں مسلم اور مسیحی مقدس مقامات کی اردن کی جانب سے مستقل سرپرستی اور خطے میں امن و استحکام کے لیے ہاشمی مملکت کی کاوشوں کو سراہا۔ ملاقات میں فلسطین کی موجودہ صورتحال اور مشرقِ وسطیٰ کی تازہ ترین پیشرفت پر تفصیلی تبادلہ خیال بھی کیا گیا۔