ایران سے ڈیل کرنا چاہتے ہیں، بات چیت جاری ہے: امریکی صدر

لاس ویگاس میں ایک تقریب سے خطاب کرتے ہوئے امریکی صدر ڈونلڈ ٹرمپ نے انکشاف کیا ہے کہ امریکہ اور ایران کے درمیان سفارتی بات چیت جاری ہے اور وہ فوجی کارروائی کے بجائے معاہدے کو ترجیح دیتے ہیں، کیونکہ وہ لوگوں کو مارنا نہیں چاہتے۔ امریکی صدر کا کہنا تھا کہ دونوں ممالک کے درمیان اہم امور پر گفتگو ہو رہی ہے اور دیکھنا ہوگا کہ اس کا کیا نتیجہ نکلتا ہے، تاہم انہوں نے واضح کیا کہ ایران کو کسی صورت ایٹمی ہتھیار رکھنے کی اجازت نہیں دی جائے گی۔

صدر ٹرمپ نے مزید کہا کہ اس سے قبل آبنائے ہرمز کی مکمل اور فوری بحالی سے متعلق بات چیت ہوئی ہے، جو اس وقت سفارتی عمل کا پہلا مرحلہ ہے۔ ان کا کہنا تھا کہ بحری راہداری کا کھلنا پہلا اہم قدم ہے جس کے بعد دوسرے مرحلے میں ایران کے نیوکلیئر پروگرام اور جوہری خطرات کے خاتمے پر تفصیلی مذاکرات کیے جائیں گے۔ امریکی صدر نے تنبیہ بھی کی کہ اگر سفارتی کوششیں ناکام ہوئیں تو امریکہ کے پاس دیگر اختیارات بھی موجود ہیں، تاہم ان کی ترجیح بات چیت کے ذریعے معاملے کا حل نکالنا ہے۔