30 دن تک بغیر دھوئے پہنے جانے والی ٹی شٹ متعارف

امریکی ملبوسات بنانے والی کمپنی ہیرکلیون نے ‘وی 5.0 ہیرک شرٹ’ (V5.0 Herk Shirt) کے نام سے ایک ایسی جدید ٹی شرٹ متعارف کروائی ہے جس کے بارے میں دعویٰ کیا گیا ہے کہ اسے مسلسل 30 دن تک بغیر دھوئے اور بغیر کسی بدبو کے پہنا جا سکتا ہے۔ کمپنی کے مطابق اس کی تیاری میں سات خصوصی اجزا—بشمول تانبا، چاندی، زنک، سونا، آتش فشانی راکھ اور دو خفیہ اجزا—کو کپڑے کے ریشوں کے اندر شامل کیا گیا ہے۔ اس منفرد ٹیکنالوجی کی وجہ سے تانبا بیکٹیریا کی افزائش کو روکتا ہے، زنک پسینے کی بدبو کو بے اثر کرتا ہے اور آتش فشانی راکھ نمی کو جذب کرتی ہے، جس سے کپڑے کی عمر میں بھی اضافہ ہوتا ہے۔

اگرچہ گرمیوں کے موسم میں پسینے کے مسئلے کے باعث اس دعوے پر کچھ سوالات اٹھائے جا رہے ہیں، لیکن کمپنی کا اصرار ہے کہ یہ ٹیکنالوجی عملی استعمال میں مکمل طور پر کارآمد ثابت ہوگی۔ اس وی 5.0 ہیرک ٹی شرٹ کی قیمت 79 امریکی ڈالر مقرر کی گئی ہے، جس کی شپمنٹ نومبر کے آغاز سے شروع ہوگی۔ ابتدائی طور پر یہ صرف سیاہ رنگ میں دستیاب ہوگی جبکہ بعد میں اسے نیوی بلیو، برگنڈی اور گہرے سبز رنگوں میں بھی پیش کیا جائے گا۔