پیٹریاٹ میزائل بنانے پر امریکا اور یوکرین کے مذاکرات، ٹرمپ کے تحفظات برقرار

امریکا اور یوکرین کے درمیان پیٹریاٹ فضائی دفاعی میزائلوں کی مقامی سطح پر تیاری کے لیے اہم مذاکرات جاری ہیں، تاہم امریکی صدر ڈونلڈ ٹرمپ نے اس ممکنہ معاہدے پر اپنے تحفظات کا اظہار کیا ہے۔ غیر ملکی خبر رساں ادارے رائٹرز کے مطابق، زیر غور تجاویز میں یوکرین میں میزائل کے کچھ پرزے تیار کر کے انہیں حتمی اسمبلنگ کے لیے جرمنی بھیجنا، یوکرین کو موجودہ امریکی یورپی پیٹریاٹ پروگرام میں شامل کرنا، یا کم لاگت والا ورژن تیار کرنے کی اجازت دینا شامل ہے۔ تاہم ذرائع کا کہنا ہے کہ کسی بھی نئی پیداوار کی صورت میں یوکرین کو فیلڈ میں میزائلوں کی فراہمی شروع ہونے میں کم از کم ایک سال یا اس سے زیادہ کا وقت درکار ہو گا۔

یہ پیش رفت ایسے وقت میں سامنے آئی ہے جب یوکرینی صدر وولودیمیر زیلنسکی نے خبردار کیا ہے کہ روس کے مسلسل اور شدید میزائل حملوں کے باعث یوکرین کے پاس پیٹریاٹ میزائلوں کا ذخیرہ تقریباً ختم ہو چکا ہے۔ دوسری جانب، نیٹو میں امریکی سفیر اس اہم منصوبے کو آگے بڑھانے اور درپیش رکاوٹوں کو دور کرنے میں مرکزی کردار ادا کر رہے ہیں، تا کہ یوکرین کی فضائی دفاعی صلاحیتوں کو مستقل بنیادوں پر مضبوط بنایا جا سکے۔