جنوبی لبنان میں اسرائیلی فوج کے حملے، ایک شخص جاں بحق، 11 زخمی

جنوبی لبنان میں اسرائیلی فوج کی جانب سے کی جانے والی تازہ کارروائی کے نتیجے میں ایک شخص جاں بحق جبکہ 11 افراد زخمی ہو گئے ہیں۔ سرکاری خبر رساں ادارے کی رپورٹ کے مطابق صیہونی فورسز کے اس حملے کے باعث جنوبی لبنان کے شہر تبنین کے قبرستان میں واقع جنازہ گاہ کی چھت کو بھی شدید نقصان پہنچا ہے۔

اسرائیلی فوج نے اس کارروائی کی تصدیق کرتے ہوئے دعویٰ کیا ہے کہ یہ حملے حزب اللہ کی جانب سے جنگ بندی معاہدے کی مبینہ خلاف ورزیوں کے جواب میں کیے گئے ہیں۔ اسرائیلی فورسز کے مطابق تازہ ترین فضائی و زمینی کارروائیوں کا مقصد جنوبی لبنان میں حزب اللہ کے اہم ٹھکانوں اور عسکری انفراسٹرکچر کو نشانہ بنانا تھا، جس کے بعد علاقے میں ایک بار پھر شدید کشیدگی پھیل گئی ہے۔