امریکا، چین اور روس کے درمیان محدود نوعیت کی نئی شراکت داریاں قائم

ایف بی آئی کے ڈائریکٹر کاش پٹیل نے انکشاف کیا ہے کہ امریکہ نے گزشتہ ایک سال کے دوران چین اور روس کے ساتھ محدود نوعیت کی نئی شراکت داریاں قائم کی ہیں، جن کا بنیادی مقصد فینٹا نائل کی اسمگلنگ، سائبر فراڈ، بچوں کے جنسی استحصال اور دیگر بین الاقوامی جرائم کے خلاف مشترکہ پیش رفت کرنا ہے۔ خبر ایجنسی رائٹرز کو دیے گئے ایک انٹرویو میں انہوں نے بتایا کہ دونوں ممالک کے ساتھ باقاعدہ ورکنگ گروپس تشکیل دیے گئے ہیں، جن کے تحت انٹیلی جنس شیئرنگ، مشترکہ تحققیات، اہلکاروں کے تبادلے اور بعض مواقع پر مل کر چھاپے اور گرفتاریاں عمل میں لائی جا رہی ہیں۔ کاش پٹیل کے مطابق چینی قانون نافذ کرنے والے اہلکار امریکہ جبکہ ایف بی آئی کی ٹیمیں بھی مقدمات پر کام کے لیے باقاعدگی سے چین کا دورہ کرتی ہیں۔

انٹرویو کے دوران ایف بی آئی ڈائریکٹر نے مئی میں کی گئی ایک بڑی بین الاقوامی کارروائی ‘آپریشن سینڈ ڈالر’ کی تفصیلات بتاتے ہوئے کہا کہ چین کی وزارت پبلک سکیورٹی اور دبئی پولیس کے تعاون سے دبئی میں سائبر فراڈ کے ایک بڑے مرکز پر چھاپہ مارا گیا۔ اس مشترکہ آپریشن کے نتیجے میں 300 افراد کو گرفتار، 300 ملین ڈالر کی رقم ضبط اور انسانی اسمگلنگ کا شکار ہونے والے ہزاروں افراد کو آزاد کروایا گیا۔ کاش پٹیل نے واضح کیا کہ یہ تعاون محض مخصوص اور سنگین جرائم کے خاتمے تک محدود ہے اور اس سے امریکہ کے روایتی اتحادیوں کی اہمیت پر کوئی اثر نہیں پڑے گا۔