عراق کا خطے میں بڑھتی کشیدگی پر اظہار تشویش، فریقین سے تحمل کا مظاہرہ کرنے پر زور

عراق نے خطے میں تیزی سے بڑھتی ہوئی سیاسی و عسکری کشیدگی پر گہری تشویش کا اظہار کرتے ہوئے تمام متعلقہ فریقوں پر زور دیا ہے کہ وہ انتہائی تحمل کا مظاہرہ کریں اور حالات کو مزید خراب ہونے سے بچائیں۔

عراقی وزارتِ خارجہ کی جانب سے جاری کردہ ایک باضابطہ بیان میں کہا گیا ہے کہ بغداد کو بین الاقوامی تجارتی راستوں اور خصوصاً سمندری سلامتی کو لاحق حالیہ خطرات پر شدید تشویش ہے۔ بیان میں واضح کیا گیا ہے کہ خطے میں کسی بھی ایسے اقدام یا مہم جوئی سے ہر صورت گریز کیا جانا چاہیے جو کشیدگی میں مزید اضافے کا باعث بنے یا بین الاقوامی بحری جہاز رانی کی سلامتی، آزادانہ نقل و حرکت اور تحفظ کو خطرے میں ڈالے۔

عراقی وزارتِ خارجہ نے اپنے عزم کا اعادہ کرتے ہوئے مزید کہا کہ بغداد حکومت مشرقِ وسطیٰ اور اس سے متصل خطوں میں کشیدگی کو کم کرنے، بحرانوں کے حل اور پُرامن ماحول قائم کرنے کے لیے بین الاقوامی سطح پر کی جانے والی تمام سفارتی کوششوں کی بھرپور حمایت کرتی ہے اور خود بھی اس حوالے سے اپنا مثبت کردار ادا کرنے کے لیے تیار ہے۔