وزیراعلیٰ بلوچستان کا ہنہ اڑک کے گاؤں ببری کا دورہ، آپریشن شعبان کا جائزہ لیا

وزیراعلیٰ بلوچستان میر سرفراز بگٹی نے ہنہ اڑک کے علاقے ببری کا دورہ کیا، جہاں انہوں نے دہشت گردوں کے خلاف جاری ‘آپریشن شعبان’ کی پیشرفت کا تفصیلی جائزہ لیا۔ اس موقع پر وزیراعلیٰ نے آپریشن میں حصہ لینے والے پولیس فورس کے جوانوں سے ملاقات کی اور ان کی بے مثال بہادری، غیر متزلزل عزم اور اعلیٰ پیشہ ورانہ صلاحیتوں کو زبردست خراجِ تحسین پیش کیا۔ فورس کے جوانوں نے وزیراعلیٰ کو اپنے درمیان پا کر شدید مسرت کا اظہار کیا اور ان کے ہمراہ ‘پاکستان زندہ باد’ کے فلک شگاف نعرے لگائے۔ میڈیا سے گفتگو کرتے ہوئے سرفراز بگٹی کا کہنا تھا کہ دہشت گردی کے خلاف جنگ میں ہماری سکیورٹی فورسز کی قربانیاں پوری قوم کے لیے باعثِ فخر ہیں؛ انہوں نے عزم دہرایا کہ دہشت گردوں اور ان کے سہولت کاروں کے خلاف یہ کارروائیاں آخری دہشت گرد کے خاتمے تک پوری قوت کے ساتھ جاری رہیں گی۔