مریم نواز کا حقِ خودارادیت کیلئے جان دینے والے کشمیریوں کو خراجِ تحسین

وزیراعلیٰ پنجاب مریم نواز شریف نے یومِ شہدائے کشمیر کے موقع پر حقِ خودارادیت کے لیے اپنی جانوں کا نذرانہ پیش کرنے والے کشمیری بہن بھائیوں کے لازوال جذبے کو شاندار خراجِ عقیدت پیش کیا ہے۔ اپنے خصوصی پیغام میں انہوں نے کہا کہ 13 جولائی 1931 کے 22 شہداء سمیت ہر کشمیری شہید کا لہو آزادی کی عظیم اور بے مثال داستان ہے۔ وزیراعلیٰ نے عالمی برادری پر زور دیا کہ وہ اقوامِ متحدہ کی قراردادوں کے مطابق کشمیریوں کو ان کا جائز حق دلوانے کے لیے موثر اور کلیدی کردار ادا کرے۔ مریم نواز شریف کا کہنا تھا کہ مقبوضہ جموں و کشمیر کے غیور عوام نے اپنے خون سے آزادی کی جو شمع روشن کی ہے، وہ آج بھی ان کے غیر متزلزل عزم و حوصلے کی صورت میں زندہ ہے اور یہ گراں قدر قربانیاں کبھی رائیگاں نہیں جائیں گی۔ انہوں نے اس امید کا اظہار کیا کہ وہ دن دور نہیں جب اہل کشمیر آزادی کی نئی صبح دیکھیں گے، اور ساتھ ہی انہوں نے کشمیری عوام کی اخلاقی و سیاسی حمایت جاری رکھنے کے عزم کا اعادہ بھی کیا۔