پنجاب میں مریضوں کے لئے ” اے آئی پاورڈ اسیکنر” متعارف کرانے کا فیصلہ

لاہور: وزیراعلیٰ پنجاب مریم نواز شریف نے صوبے کے ہسپتالوں میں مریضوں کی فوری تشخیص اور علاج کے لیے جدید ترین ’’اے آئی پاورڈ ملٹی ڈیزیز سکینر‘‘ (AI-Powered Multi-Disease Scanner) متعارف کرانے کا اصولی فیصلہ کر لیا ہے۔

تفصیلات کے مطابق معروف چینی ٹیکنالوجی کمپنی ’علی بابا‘ (Alibaba) کے اعلیٰ سطحی وفد اور ایگزیکٹوز نے وزیراعلیٰ مریم نواز سے ملاقات کے دوران مصنوعی ذہانت سے لیس اس جدید طبی سکینر پر تفصیلی بریفنگ دی۔ بریفنگ میں بتایا گیا کہ اے آئی پاورڈ کنٹراسٹ سی ٹی اسکین (Contrast CT Scan) ٹیکنالوجی کی مدد سے صرف دو منٹ کے مختصر وقت میں 10 مختلف مہلک بیماریوں کی درست تشخیص ممکن ہو سکے گی۔

یہ جدید ٹیکنالوجی بیماریوں کی اسکریننگ، ابتدائی تشخیص، معالجاتی منصوبہ بندی اور مریضوں کی مینجمنٹ کے عمل میں اہم پیش رفت ثابت ہوگی۔ اس سکینر کے ذریعے لبلبے (Pancreas)، جگر (Liver)، معدے (Stomach)، غذائی نالی (Esophagus) اور بڑی آنت (Colon) سمیت مختلف اقسام کے پیچیدہ اور مہلک کینسر کی بروقت نشاندہی کی جا سکے گی۔ وزیراعلیٰ پنجاب نے محکمہ صحت کو ہدایت کی ہے کہ وہ صوبے میں اس جدید سکیننگ ٹیکنالوجی کے پائلٹ پراجیکٹ کا لائحہ عمل فوری طور پر تیار کر کے پیش کرے۔