چین: کمر کا کامیاب آپریشن، تین نومولودوں کے وزن کے برار گانٹھ نکال دی

چین کے شہر لہاسا میں طبی دنیا کا ایک غیر معمولی اور حیرت انگیز واقعہ سامنے آیا ہے جہاں سرجنوں نے 71 سالہ شخص کی کمر سے 10 کلوگرام وزن کی چربی کی گانٹھ (Lipoma) کا کامیاب آپریشن کر کے اسے سالِم حالت میں نکال دیا ہے۔ متاثرہ شخص گزشتہ 30 سال سے اس گانٹھ کے ساتھ زندگی گزار رہا تھا، تاہم گزشتہ دو سال کے دوران اس کا سائز اچانک تیزی سے بڑھنے لگا جس سے اس کی کمر اور کندھے کے پٹھوں پر شدید دباؤ پڑ رہا تھا اور روزمرہ کی زندگی اجیرن ہو چکی تھی۔

یہ بڑی اور نرم گانٹھ مریض کے بائیں کندھے سے لے کر کمر کے نچلے حصے تک پھیلی ہوئی تھی، جس کا حجم 56 × 54 × 28 سینٹی میٹر تھا—جو ہوائی جہاز کے کیبن میں لے جانے والے عام بیگ سے بھی بڑا ہے۔ ڈاکٹروں کے مطابق 10 کلوگرام کا یہ وزن تقریباً تین صحت مند نومولود بچوں کے اوسط وزن کے برابر ہے۔ سرجنوں کی ٹیم نے انتہائی مہارت کے ساتھ چیرا لگا کر خون کی رگوں کو باندھا اور اس دیوہیکل گانٹھ کو ایک ہی ٹکڑے کی صورت میں بغیر توڑے باہر نکال لیا۔ حیران کن طور پر اس پیچیدہ اور بڑے آپریشن کے دوران مریض کے جسم سے صرف 100 ملی لیٹر خون کا ضیاع ہوا۔