قدیم چین میں انسانوں کی قربانی کے انکشاف، مرد و خواتین مختلف رسومات کیلئے قربان کیے جاتے تھے

چین میں ہزاروں سال پرانے معاشرے سے متعلق اہم انکشاف سامنے آیا ہے۔ ماہرینِ آثارِ قدیمہ کے مطابق 3800 سے 4300 برس قبل پتھر کے دور کے ایک سماج میں مردوں اور عورتوں کو مختلف رسومات اور سماجی مقاصد کیلئے قربان کیا جاتا تھا۔

چائنیز اکیڈمی آف سائنسز کی تحقیق میں انکشاف ہوا ہے کہ شمال مغربی چین میں دریافت ہونے والی ایک قدیم بستی کی اشرافیہ کی قبروں میں خواتین کی لاشیں ملی ہیں، جنہیں واضح طور پر رسماً قربان کرکے دفن کیا گیا تھا۔

تحقیق کے مطابق پہلی بار ایسے شواہد بھی ملے ہیں کہ اس دور میں مردوں کی اجتماعی قبریں موجود تھیں، جن کا تعلق عوامی مذہبی رسومات کیلئے کی جانے والی اجتماعی انسانی قربانی سے جوڑا گیا ہے۔

ماہرین کا کہنا ہے کہ اس قدیم معاشرے میں انسانوں کی قربانی کی دو اقسام رائج تھیں:

• اجتماعی قربانی: جس میں مردوں کو ایک ساتھ دفن کیا جاتا تھا، جو عوامی اور مذہبی رسومات کیلئے ہوتی تھی۔

• اشرافیہ کی تدفین: جس میں اعلیٰ مرتبے کے افراد کی قبروں کے ساتھ خواتین کو قربان کر کے دفن کیا جاتا تھا۔

ماہرین نے اس دریافت کو چین کے قدیم سماجی ڈھانچے اور مذہبی رسومات کو سمجھنے کے حوالے سے انتہائی اہم قرار دیا ہے۔