بھارتی عدالت کا جیکولین فرنینڈس سمیت دیگر پر فرد جرم عائد کرنےکا فیصلہ

نئی دہلی: بھارتی عدالت نے 200 کروڑ روپے کے ہائی پروفائل منی لانڈرنگ کیس میں بالی وڈ کی معروف اداکارہ جیکولین فرنینڈس سمیت دیگر 15 افراد پر باقاعدہ فردِ جرم (Charges) عائد کرنے کا بڑا فیصلہ کر لیا ہے۔

بھارتی میڈیا رپورٹس کے مطابق، نئی دہلی کی عدالت نے کیس کی سماعت کے دوران ریمارکس دیے کہ دستیاب شواہد کی بنیاد پر تمام ملزمان کے خلاف منی لانڈرنگ کی روک تھام کے قانون (PMLA) کے تحت مقدمہ چلانے کے لیے بادی النظر میں کافی مواد اور ثبوت موجود ہیں۔ عدالت نے کیس کی باقاعدہ کارروائی کا آغاز کرتے ہوئے اداکارہ سمیت تمام ملزمان کو 3 جون کو عدالت کے روبرو پیش ہونے کا حکم جاری کر دیا ہے۔

عدالت نے جن افراد کے خلاف فردِ جرم عائد کرنے کا فیصلہ کیا ہے، ان میں اس پورے مالیاتی فراڈ کا مرکزی ملزم اور ٹھگ سکیش چندر شیکھر بھی شامل ہے۔ اس کے علاوہ درج ذیل افراد کے خلاف بھی مقدمہ چلایا جائے گا:

• لینا ماریا پال (سکیش چندر شیکھر کی اہلیہ)

• پنکی ایرانی

• دیپک رمنانی سمیت دیگر 12 ملزمان

تحقیقات کے مطابق، مرکزی ملزم سکیش چندر شیکھر پر الزام ہے کہ اس نے اثر و رسوخ استعمال کر کے مختلف کاروباری اور امیر افراد سے کروڑوں روپے کی بھتہ خوری کی اور بڑے پیمانے پر مالی فراڈ کے ذریعے خطیر رقم حاصل کی۔

رپورٹ کے مطابق، بالی وڈ اداکارہ جیکولین فرنینڈس کا نام گزشتہ چند برسوں سے سکیش چندرشیکھر کے خلاف جاری منی لانڈرنگ کی اس سنگین تحقیقات میں مسلسل سامنے آتا رہا ہے۔ بھارتی حکام کا الزام ہے کہ جیکولین فرنینڈس اس بات سے واقف تھیں یا انہوں نے سکیش چندر شیکھر سے کروڑوں روپے مالیت کے انتہائی قیمتی تحائف، لگژری اشیاء اور دیگر مالی فوائد حاصل کیے تھے جو کہ جرائم کی رقم سے خریدے گئے تھے۔

اس کیس کی تفتیش کرنے والا بھارتی ادارہ انفورسمنٹ ڈائریکٹوریٹ (ED) اب تک متعدد مرتبہ اداکارہ کو طلب کر کے گھنٹوں پوچھ گچھ کر چکا ہے اور ان کے کئی قیمتی اثاثے بھی منجمد کیے جا چکے ہیں۔ 3 جون کو ہونے والی سماعت اس کیس میں جیکولین فرنینڈس کے مستقبل اور ان کے فلمی کیریئر کے لیے انتہائی اہم تصور کی جا رہی ہے۔