پاکستان میں فائیو جی کی لانچنگ سے متعلق بڑی پیش رفت، رمضان سے قبل نیلامی کا امکان

پاکستان میں فائیو جی سروس کے آغاز سے متعلق اہم پیش رفت سامنے آ گئی ہے۔ پاکستان ٹیلی کمیونیکیشن اتھارٹی (پی ٹی اے) نے رمضان المبارک سے قبل فائیو جی سپیکٹرم کی نیلامی کا فیصلہ کر لیا ہے۔

چیئرمین پی ٹی اے حفیظ الرحمان نے کہا ہے کہ فائیو جی سپیکٹرم کی نیلامی کے لیے تمام تیاریاں مکمل کر لی گئی ہیں اور پاکستان میں فائیو جی سروس کا اجراء اب دور نہیں رہا۔ انہوں نے بتایا کہ رمضان سے پہلے فائیو جی سپیکٹرم کی نیلامی کے لیے حکومت سے باضابطہ درخواست کی جائے گی۔چیئرمین پی ٹی اے کے مطابق فائیو جی نیلامی سے متعلق انفارمیشن میمورنڈم آئندہ 10 سے 15 روز میں جاری کر دیا جائے گا۔ انفارمیشن میمورنڈم کے اجراء کے بعد ٹیلی کام آپریٹرز کو 45 دن کا وقت دیا جائے گا تاکہ وہ نیلامی کے عمل میں حصہ لینے کی تیاری کر سکیں۔حفیظ الرحمان نے مزید کہا کہ اگر یکم جنوری تک انفارمیشن میمورنڈم جاری ہو جاتا ہے تو 15 فروری کو فائیو جی سپیکٹرم کی نیلامی ممکن ہو سکتی ہے، جس کے بعد پاکستان میں جدید فائیو جی سروس کے آغاز کی راہ ہموار ہو جائے گی