خبردار! ہیکرز نے واٹس ایپ اکاؤنٹ ہیک کرنے کا نیا راستہ ڈھونڈ نکالا

سیکیورٹی محققین نے خبردار کیا ہے کہ ہیکرز نے واٹس ایپ کے انکریپشن سسٹم میں دخل اندازی کے بغیر صارفین کے اکاؤنٹس ہیک کرنے کا ایک نیا طریقہ دریافت کر لیا ہے۔ اس طریقۂ کار کو ’’گھوسٹ پیئرنگ‘‘ کا نام دیا گیا ہے۔

ماہرین کے مطابق اس جعلسازی میں ہیکرز واٹس ایپ کے ایک فیچر کا غلط استعمال کرتے ہوئے صارفین کو دھوکے سے اپنے اکاؤنٹس ایسے ڈیوائسز کے ساتھ جوڑنے پر مجبور کر دیتے ہیں جو ہیکرز کے کنٹرول میں ہوتی ہیں۔ ایک بار اکاؤنٹ لنک ہو جانے کے بعد ہیکرز کو صارف کے پیغامات، تصاویر، ویڈیوز اور وائس نوٹس تک رسائی حاصل ہو جاتی ہے۔

سیکیورٹی محققین کا کہنا ہے کہ اکاؤنٹ پر قابو پانے کے بعد ہیکرز متاثرہ صارف کی کانٹیکٹ لسٹ میں موجود افراد کو بھی پیغامات بھیج سکتے ہیں، جس کے ذریعے مزید اکاؤنٹس ہیک کرنے کی کوشش کی جاتی ہے۔

ماہرین نے صارفین کو مشورہ دیا ہے کہ وہ غیر معروف لنکس پر کلک کرنے، مشتبہ پیغامات کا جواب دینے اور واٹس ایپ کے لنکڈ ڈیوائسز سیکشن کو باقاعدگی سے چیک کرنے میں احتیاط برتیں تاکہ اس قسم کی سائبر جعلسازی سے محفوظ رہا جا سکے۔